PRISM inhnûkdâwk hreh lo

PRISM party chuan thuchhuah siamin, Hachhek biala PRISM candidate Eddy Zosangliana Colney chuan, 'Kan ram, hnam leh sakhaw himna tur a nih a, a ṭul phawt chuan ka inhnûkdâwk hreh lo,' tia a sawi thu an tarlang.

Eddy Zosangliana hian November 5, Thawh-anni zan khan Rengdil khuaa political party tin aiawhte koh khawm an nihnaah thu sawiin, Bru vanga Mizote thawhrimna zawng zawng holam taka tawp thei dinhmuna a ding leh Mizote common candidate ngaihtuah ngai khawpa thil a awm chu lungchhiatthlak a tih thu a sawi.

Political party ṭhen-khatin Bru candidate siam an tum chung-changah, Hachhek bial chhunga NGO hrang hrang inzawmkhawm pawlte chuan Zamuang khuaa meeting an nei a, Mizote tan candidate inṭâwm (common candidate) siam an pawm a ni.