DMZP-in ECI-ah memorandum an thehlut

Delhi Mizo Zirlai Pawl (DMZP) chuan ni in khan Election Commission of India (ECI) office, New Delhi-ah kalin, Chief Election Commissioner (CEC) memorandum an thehlut a; dan loin ECI-in Bru-te Mizoram pawn, Tripura-ah vote thlaktir an tum thu te, Mizoram CEO-in repirt dik lo a pek avangin ECI-in Mizoram Home secretary Lalnunmawia Chuaungo a sawn chhuah thute an tarlang.

DMZP hian an thil phût point pali an tarlang a; ECI-in a letter no. 464/MIZ-PH/2014 (B&R) a lo chhuah tawh, Bru-te Mizoramah chauh vote an thlak a tiamna chu zâwm tura ECI an phût thu te, Lalnunmawia Chuaungo chu Mizoramah a rang thei ang bera dah leh an phût thu te, Mizoram CEO SB Shashank chu CEO anga a mawhphurhna leh a hna a tlin loh avangin Mizoram aṭanga sawn chhuah an phût thute leh, Mizoram páwna Bru-te ECI-in Mizoram pawna vote thlak a phalsak dawn a nih chuan, Mizoram pawna awm mek Mizote pawh an awmnaah ṭheuh vote thlaktir ve tura ECI an phût thute an tarlang a ni.

DMZP hian Bru-te chu anmahni duh thu ngeia Mizoram chhuahsan an nih dan te, ṭum tam tak Mizorama hruai lêt tum a nih pawha an duh loh thute leh Bru kaihhnawih thil chi hrang hrang an ziak lang bawk.