Mizoramah Chapchar Kût hman a ni ; Rinawmna hi thil pawimawh tak a ni - Kût Pa

Nimin khan Mizoram hmun hrang hrangah Chapchar Kût hman a ni a, Aizawlah chuan Vanapa Hall-ah hman niin, Kût Pa chu chief minister Zoramthanga a ni. Kût Pa chuan Kût thupui 'Rinawmna' tih chu dam chhung atana pawimawh ber pakhat a nih thu a sawi.

Chief Minister chuan tunhnaiah Mizoram chu harsatna namen loin a tlakbuak thu sawiin, "A pui berah chuan Covid-19 a ni. Hripui vangin kan inkhawm thei loa, unau leh chhungte pawh intlawhpawh thei loin kan awm. Mangangin mi tam tak an dam loa, kan na a, kan thi a ni. Damkhaw chhuah kan tum hram hram," a ti.

Ramriah buaina a awm thu sawiin Zoramthanga chuan, "Hun reitak kan hrawk tihchah tumin min dang bet a, ei leh bar pawh a harsa. Ramria buaina awm tawhah chuan a hautak ber," a ti a, buaina dang tel loin, ramri buai ringawt pawh tawrh tham a nih thu a sawi.

Chief Minister chuan Mizoramin harsatna a tawh dangte sawiin, "Kangmei nasat ber ṭum a ni a, Mizoramah helicopter-in kangṭhelh vawi khat a puihna a ni. Vawk hri a leng leh a, a sing tel an thi. Myanmar politics buaina avangin Mizoramah a sing telin an rawn awm. A hranpa pawha hautak tham tak a thleng khawm. Sum leh pai, economy-a harsatna nen he hun hi kan thleng," a ti.

Zoramthanga chuan khawvela finna leh thiamna hmuchhuaktu zinga mi Juda (Israel) te chuan harsatna namen lo an tawrh avangin tun dinhmun an thleng tih sawiin, "Ram te tak te nisiin beihrawnna karah an dam chhuak a ni," a ti a, Mizo mipuite pawhin harsatna hrang hrang kan tawhte chu entawntlak ni tura min hruailuttu atan hmang ila a duh thu a sawi.

Kût Pa chuan Kût thupui rinawmna tih chu a mawiin ṭha a tih thu sawiin, "Pawisa ngah, inkhelh thiam, zaithiam leh lehkhathiam tih aia pawimawh zawk chu - Mizote chu hnam rinawm an ni tih tura àwm hi a ni. Mizote hi kan kawng zawh tinrengah kan rinawm a ngai. Nghet lo, rinawm lo, laktlak lo nih hi talent dang tam tak chawk chhe vektu," a ti.

Mimal nun, chhungkaw nun, hnam nun leh ni tin eizawnnaah rinawm a pawimawh tih sawiin Zoramthanga chuan, "Rinawmna hi kan dam chhung atana pawimawh ber pakhat a ni," a ti a, Chapchar Kût chu Kût thupui rinawmna mahni nuna chhawm tirtu ni ngei se a duh thu a sawi.

Kût Thlengtu R Lalzirliana, Art & Culture Minister chuan Covid-19 hripui leng avangin Chapchar Kût chu kum dang anga hman theih a nih loh thu a sawi a, "A vanduaithlakin a pawi ka ti hle. Khuanu in zah a ngai anga, nakkum Chapchar Kût erawh chu hlim takin Aizawl lammualah kan hmang leh thei turah kan beisei," a ti.

Khawvel changkannain Mizoram a rawn hrut ve mek tih sawiin R Lalzirliana chuan, "Chungah chuan kan hnam nun zemawi tak leh kan ram mawina leh duhawmna te hi ṭhangtharte'n kan theihnghilh ta deuh em ni aw. Kan pipu nun mawi, kan ram leh hnam ziate phochhuak thei turin Kût kan hman dan hi her danglam deuh a ṭha in ka hria," a ti a, Zonun zemawi tuai thar leh turin Art & Culture department chuan theihtawp chhuah a tum thu a sawi.

Thusawitu dang, Central YMA president R Lalngheta chuan hripui vanga harsatna thleng chu in unauna, induhsakna leh lungrualna lantirna atan hman ṭheuh a duh thu sawiin, "Chapchar Kût hian inlungrualna leh inpumkhatna min neih thar tir se," a ti a, Chapchar Kût chu a Mizoin a Kristian thu a sawi.

CYMA President chuan tláng hrang hranga Mizote Chapchar Kût chibai bukin, "Tláng hrang hrang, ram chhung leh pawna awmte he hun puiah hian mahni awmna hmun ṭheuhah hlim taka awmin, Mizo kan nih avangin i lawm em em ang u," a ti.

Myanmar buaina avanga harsatna tawk mek Zohnahthlakte inthlahrung lo tura chahin Lalngheta chuan, "Kan tih theih tam lo mah se, Zofate Jerusalem-ah nunna in chân ai chuan lo chhuk zel ang che u," a ti a, Zohnahthlak raltlante tan theihtawp an chhuahzel tur thu a sawi.

Aizawla Chapchar Kût hmannaah hian chawhnu lamah virtual programme hman niin, zaithiamte an zai bakah, hnam làm leh lemchan en tur a awm a ni.