Central YMA-in kuhva rah tawlh bawhzui zel dawn

Central YMA executive committee March 3, Ningania an president R Lalngheta hoa CYMA Hall-a ṭhukhawm chuan kuhva rah tawlhruk chungchang chu bawhzui zel an rel.

Meeting-ah hian kuhva tawlhrûk zir chiang tura CEC-in a din study team-te'n an zirchianna report an thehluh chu general secretary Prof. Lalnuntluanga'n a sawifiah. Study team convener Prof. Malsawmliana, CYMA asst. secretary leh secretary RS Lalrinsanga, CEC-te chuan an thil hmuhte an sawi belh bawk.

Study team-in hmun hrang hranga an kal kual hnua zirchianna report ṭha tak an nei chu CYMA CEC chuan lawmawm an ti a, bawhzui zel an rel. CYMA OB-te leh study team-te'n a ṭul anga ruahmanna siamin, CEC-ah pawh la ngaihtuah zel atan an dah.

CYMA CEC chuan Mizoram Building & Others Construction Workers Welfare Board aṭanga mem­ber ni thei tur dik tak chauhin member an nih theihna tura hmâ lak pui tura YMA an ngenna chu tih hlawhtlin nise an ti a; All Mizoram Cement & Iron Rod Dealers Association aṭanga Mizorama rod size dik zawrh a nih theihna tur leh hnamdang leh Mizo hming hawha vai dawr awmte zawng chhuaka hma lak pui tura an ngenna pawh bawhzui an remti bawk.