KHAWTHLIR

PYD Day
Nimin, March 4, 2022 kha Mizoram UPC kohhran ṭhalai pawl, Pentecostal Youth Department (PYD) din champha vawi 61-na a ni a, PYD Day pual hian tualchhung kohhran leh biala Mizoram PYD-te'n an remchan angin hun an hmang. Hmun tam zawkah chuan khawtlang tana thil ṭha tihna hun atan hmangin, vantlang hmunhmate an tihfai bakah hmun hrang hrangah thilpek an hlàn. Tun dinhmunah Mizoram UPC kohhran ṭhalaiah hian member 11,643 an awm.

Lui tifai
Mizoram Pollution Control Board, Mamit huaihawtin nimin khan Mamit thlanga lui pakhat, Saitlan luidung tihfai hnatlang neih a ni. Lui tihfai hnatlangah hian Mamit Branch KṬP hnuaia Pastor Biala group-te an thawk chhuak a, field assistant VLMS Dawngkima'n a ho.

Medical camp
Nimin khan 23 Sector Assam Rifle leh Inspector General Assam Rifles (East) ṭangkawp chuan New Vaikhawtlang khuaah free ortho medical camp an buatsaih. Medical camp-ah hian mi 304 in entirin, a thlawnin damdawi pek an ni.

Bamboo link road
Congress Legislature Party leader Zodintluanga zawhna ziaka chhangin PWD changtu chief minister Zoramthanga chuan NLCPR hnuaiah Tuirial - Bukpui bamboo link road atan cheng nuai 705.29 hmuh a nih thu a tarlang a, "Physical achievement 31.50% leh financial achievement cheng nuai 827.75 a ni," a ti.

Iron rod hreng
Sub-Committeee on Quality Control of Cement & Iron Rod chu March 3, Ningani khan an ṭhukhawm a; an hmalakna leh hmachhawpte an sawiho. He hunah hian LRS Center, Ṭhuampui in iron rod size tling lo kg 64,966 leh m/s Zamlova Enterprise, ITI in a buk tling lo iron rod tlawn 1,750 an kawlte an hrensak thu tarlan a ni.