Mizoram sorkarin Budget pawn aṭangin vbc. 175 dawng; Hri dona atan bik vbc. 53 hmu

Kum 2021-2022 chhungin Covid-19 avangin budget-a ruahmansa sum cheng eng emaw zat hmuh a nih loh rualin, Finance department chuan budget pawn lam aṭangin cheng vbc. 175.49 a hmu. Hetihlai hian, Covid-19 dona atan bik hrim hrim cheng vbc. 53.42 hmuh a ni a, hei hi Finance department hmuh zingah hian tarlan tel a ni lo.

February 24, 2022-a kum 2022-2023 budget a pharhnaah chief minister Zoramthanga chuan Mizoramin nasa takin sum harsatna a tâwk tih sawiin, "Kum hmasa lam daih aṭang tawh khan kan tax share dawn tur zat kan dawng kim lo tam hle. January-March 2020 chhung khan cheng vbc. 867.39 kan hmu kim lo a, kum 2020-21 chhunga kan hmuhin cheng vbc. 1,093.73-in kan budget bituk a phak loh bakah, kum 2021-22 quarter hmasa ber khan cheng vbc. 125.46-in kan hmuh tur zat kan hmu pha lo," a ti.

Chief Minister chuan Finance Commission-in Mizoramin 2019-2020 ah tax share leh revenue deficit grant a hma kum nena khaikhina hmu tlem ta hle tura a ngaih avangin cheng vbc. 546 special grant pek tura a rawt thu sawiin, "Special grant hi tun thlengin pek kan la ni lo," a ti a, sum hmuh tur zat hmuh kim tak loh zawng zawng chu cheng vbc. 2,632.58 a nih thu a sawi.

Hetihlai hian, Mizoram sorkar chuan central ministry hrang hrang aṭangin kum 2021-2022 chhungin cheng vbc. 175.49 a dawng a, hmasawnna hrang hrang hnathawhna atan te, training buatsaihna atan te, programme kal mek chhunzawmna atan te, festival hmanna atante leh thildang atana hman tura tih a ni.

Health department chuan Covid-19 dona atan sorkar laipuia funding agency hrang hrang aṭangin cheng vbc. 53.42 a dawng tawh thung. Sumte hi North Eastern Council, National Health Mission, North East Special Infrastructure Development Scheme leh ICMR aṭangtea dawn a ni.