Mizoramin leiba vaibelchhe 9,881.09 a nei ; Sum enkawl thiam loh vang a ni lo; A huna hlawh pek loh hi state sorkar mualphona a ni lem lo - CM
Assembly session neih mekah ZPM member C Lalsawivunga zawhna ziaka chhangin Finance changtu chief minister Zoramthanga chuan Mizoramin leiba a neih zat chu cheng vbc. 9,881.09 (2020-2021 actual figure) a nih thu tarlangin, "Financial management thiam loh vang a ni lo," a ti.
Finance Minister chuan sorkar hnathawk hlawh a hun taka pek theih loh chu, "Sorkar mualphona a ni lem lo," a ti.
Chief Minister chuan leibate chu hun rei tak aṭang tawha sum puk la rulh zawh loh tlingkhawmte leh hmasawnna ruhrel siamna tura nakina la rulh leh tura sum puk thar zelte an nih thu tarlangin, "A hun taka rulh tur a ni a, rulh theih loh a la awm lo," a ti a, leiba vangin financial management lamah harsatna a awm loh thu a sawi.
Sorkar sum thawhchhuah chu inrelbawlna piah lama hmasawnna kalpuina tham a nih loh thu tarlangin Zoramthanga chuan, "Chuvangin, hmasawnna kalpui nan sum puk ṭhin a ni. A hun bithliah a zirin kum 10 te, 15 hnuahte rulh leh tur a ni," a ti.
Sorkar hnathawkte hlawh pek a nih loh ṭhin chhan zawhna chhangin Chief Minister chuan, "Kum 2021-2022 budget-ah sorkar hnathawkte hlawh tur hi pass vek ni tawh mah sela, expenditure lama kan inruahmanna ringawt hi income lamah kan inruahman anga kan hmuh loh chuan duh angin hman ngawt theih a ni lo," a ti a, sorkar hnathawkte hlawh tur chu budget-ah pass ni mah se, Revenue Receipt lama beisei ang sum hmuh a nih loh chuan a hun takah sorkar hnathawk hlawh pek theih a nih ṭhin loh thu a sawi.
CM chuan hlawh tura tih chu thil dangah hman theih a nih loh tih a sawi hnuah, "Ṭul bik thilah chuan Finance department phalnain thildangah hman theih a ni," a ti.
A hun taka hlawh pek theih loh chu sorkar mualphona a nih leh nih loh zawhna chu CM chuan, "Mizoram sorkar sum harsatna hi thui tak chu Finance Commission recommendation-ah leh central sorkar sum pek chhuah danah a innghah avangin state sorkar mualphona a ni lem lo," tiin a chhang.