RD Minister-in leì dawh mek a tlawh

Rural Development (RD) minister Lalruatkima chuan nimin khan Nghalchâwmkaia leì (foot suspension bridge) dawh mek leh, Sihhmui leh Sairanga RD department hmalaknate a enfiah. Minister chuan leì dawh mek chu a nih tur ang taka ṭha, mipuite'n ṭangkai taka an chhawr theih tur leh an rin ngam tura tih a nih tur thu a sawi.

Nghalchâwmkaia leì dawh mek hi Reiek RD Block hnuaia awm niin Sihhmui leh Nghalchawm inkalpawhna tur a ni. Lei hi metre 70-a thui tur a ni a, Tlawng lui kána dawh niin SEDP 2019-2020 hnuaiah Rs 30,40,000 senga dawh tura ruahman a ni. A foundation siam zawh tawh a ni a, anchor block khawih mek a ni.

RD Minister-in a tlawhnaah hian a sakna hmanraw chi hrang hrang rod, balu etc. te chu RD department engineer-te'n an endik nghal a ni.

RD Minister hian leì pannaah lirthei kal thei turin ruahmanna a siam pui nghal a; Sihhmui Community Hall leh Sairang VC Hall sak mek te, Sairanga ruang halna hmun panna kawng zauh dan turte khawtlang hruaitute nen an sawiho nghal bawk.

Lalruatkima hi Aizawl West-I bialtu MLA Zothantluanga'n a ṭawiawm.

Tarlan tawh angin, March 2, 2022 Assembly session-ah opposition group leader Lalduhoma chuan Nghalchâwmkaia lei dawh hna hi Aizawl West-I Block MNF-te'n an thawh thu sawiin, "An rod hman sût thum a ni a, balu pangngai an hmang lo. Ban khur a thûk lo em em a, mipuiin a tlo loh an hlau," tiin, hlêp tam lutuk loa ṭha deuh hleka dawh theih dan a awm leh awm loh RD Minister hi a zâwt a ni.