Kângmei vèn awareness rally buatsaih

Champhai Zotlang Riders, Bullet Club leh Champhai Forest Division ṭangkawpte chuan kângmei vèn kawnga mipui inzirtir nan nimin khan Zote, Ngur, Vapar leh Hnahlan-ah Awareness Rally an buatsaih.

Champhai DFO Lalduhthlana chuan an district-ah kângmei a chhuah nasat ṭhin thu sawiin, "Ramngaw hloh a tam ṭhin hle. Rally hian ramkang ven chungchangah rah ṭha a chhuah ngei ka beisei," a ti a, mipuite chu kangmei ti chhuak lo tura mahni theihna zawn ṭheuha ṭan khawh turin a chah.

Zotlang Riders, Bullet Club leh Champhai Forest Division-te hian rally an neihna khuaahte hian khawtlang hruaitute titipuina hun an hmang zel a ni.