Capping and Lamp Lighting Ceremony hmang

Auxiliary Nurse Midwife (ANM) School, Lawngtlai chuan March 3, Ningani khan Lai Autonomous District Council (LADC) conference hall-ah nursing zirlai batch 5-na te pualin Capping and Lamp Lighting Ceremony an hmang a, LADC CEM V Zirsanga'n a hmanpui.

V Zirsanga chuan ANM School-in result ṭha tak an nei ṭhin chu Lawngtlai district ti hmingṭhatu a ni tih sawiin, "Principal leh thawktute inpekna a fakawm takzet. Zirlaite'n lukhum var khuma khawnvar in chhit hi a awmze dik tak ngaihtuah chungin in zirna leh hna thawhnaah a takin nunpui ang che u," a ti a, beiseina eng chhitu nih tum turin a chah.

Midang tana malsawmna nih leh thil ṭha tih tluka nun hlimna a awm lo tih sawiin V Zirsanga chuan,"Sathau khawnvar anga mi dang tana inpe leh luang rala damlote thinlung hliamtu aia hlimna petu leh beiseina siamtu nih tum ṭheuh ang che u," a ti.

Lawngtlai District Hospital nursing superintendent Lalengmuani chuan zirlai thar mi 20-te lukhum khumtirin khawnvar a chhittir a, thu tiam an sawi rual nghal bawk.

He hunah hian kum 2021 Mizoram Nursing Council Examination-a ANM School Lawngtlai aṭanga top 10-a lang first year zirlai mi pathum leh second year zirlai pali hnenah chawimawina (proficiency award) hlan a ni.

ANM School Lawngtlai hi October 2017-ah din niin batch thumìn an zir chhuak tawh a; tun dinhmunah principal pakhat, tutor pali, non-teaching staff pariat leh zirlai 40 an awm mek.