Serchhipah art workshop buatsaih

Serchhip District Beti Bachao Beti Padhao (BBBP) chuan March 3, Ningani khan DC conference hall-ah art workshop an buatsaih a, district bawrhsap Nazuk Kumar-i'n a hawng.

Workshop hawnna inkhawm hi additional DC Lalmuansanga Ralte in a kaihruai a; Nazuk Kumar chuan India ram hmun tam takah hmeichhiate dinhmun a la hniam hle tih sawiin, "Venhimna leh zirtirna ṭha pek thu-ah nasa taka hmasawnna tur a la awm hlawm a, Mizoram erawh chu hmun dangte ngaihtuah chuan kan dinhmun a ṭha hle," a ti.

Hmasawn ngaihna lai tam tak a la awm tih sawiin Bawrhsap chuan,"Property right leh legal right chi hrang hrangah hmasawn ṭulna a la awm a, hmeichhiate'n hma kan sawn zel theih nan hmalakna pawh kawng hrang hrangin kalpui zel a ni," a ti a; art workshop a hlawhtlin theih nana thawhpuitu Aizawl Art Gallery & School of Fine Art-te chungah a lawm thu a sawi.

Workshop-ah hian Aizawl Art Gallery & School of Fine Arts-a senior artists pathum, junior artists 12 leh Bawrhsapte chuan, Women Empowerment, Promotion of Education to Girl Child leh Gender Equality hmangin lem an ziak a, an lem ziahte hi International Women’s Day, 2022 lawmnaah exhibition neihpui leh tura ruahman a ni.