Mamit District Sports Complex atan Inremna thuthlung ziah a ni

Mamit District Sports Complex, Bàwngva a sakna tur hmuna in neitu chhungkaw 18 te leh Mizoram State Sports Council (MSSC) te chuan nimin khan Aijal Club-ah inremna thuthlung an ziak.

Inremna thuthlung ang chuan chhungkaw 18 te hi Bàwngva village council-ìn inhmun an pekah an sawn ang a, an in leh huan thlai an pek avanga lawmthu sawi nan MSSC chuan pawisa a pek bakah, an inhmun thara in thar an sak dan tur a ngaihtuah pui dawn a ni.

Inkhawm hmanpuitu Sports minister Robert Romawia Royte chuan chhungkaw 18-te'n an in an pe phal chu lawmawm an tih thu sawiin, "MSSC-in tuna an chenna aia ṭhaa in thar an neih leh vat theihnana thiam taka ruahmanna an siam-te hi a lawmawm hle. Bawngva VC-ten inhmun thar an ruahmante hi ropui ka ti a, in thar nei turte ka lawmpui hle," a ti.

Sports Minister chuan “Mamit district hi Mizoram district zinga sports infrastructure nei chhe bera sawi a ni reng ṭhin a, tun aṭanga rei loteah erawh chuan CM zahawm tak Pu Zoramthanga zarah sports infrastructure nei ṭha district zingah a tel ngei dawn a ni,” a ti a,Chapchar Kût ní ngeia inremna ziahfel a ni chu lawmawm a tih thu a sawi.

Mamit District Sports Complex hi cheng nuai 4,400 senga din tura ruahman a ni. MSSC hruaitute chuan inremna ziah a nih takah chuan kar leh aṭanga hnathawh ṭan an tum thu an sawi.