KHAWTHLIR

Gas bûk tling lo Thawn let leh
Mamit Venghlun Branch YMA chuan nimin khan an veng chhunga MIZOFED-in eirawngbawlna gas an sem tur an endiknaah a bûk tling lo eng emaw zat an hmu chhuak a, gas-te chu an thawn kîr leh. Gas hi Mualkhang Bottling Plant aṭanga lak niin, a phurtu chu MZ-06 7032 a ni a; YMA duty-te'n an bûknaah kg. 2 chuangtein a tling lo hlawm a ni.

Ngopa-in thláwp
Ngopa NGO Coordination Committee chuan Mizoram chief electoral officer (CEO) SB Shashank chêt dan chungchang duh lohna leh Tripura-a relief camp-a vote thlaktir duh loa Mizorama tlawmngai pawl hrang hrang hmalakna hi ṭha an tih thu an tarlang a, "Kan ram leh hnam chhan nan a tawp thlengin kan thlawp ang. MLA inthlan lo awm turah NGO Coordination Committee duh dan ang ngeia inthlanna boruak muanawm leh felfai tak neih hi kan duh dan a ni," an ti.

CEO Delhi-ah
Election Commission of India (ECI)-in New Delhi-a kal tura a koh angin Mizoram chief electoral officer (CEO) SB Shashank chuan nimin khan Delhi panin Mizoram a chhuahsan. Vanglaini palai zawhna chhangin CEO chuan, vawiin chawhma dar 10-ah ECI hotute nen an inkawmna aṭangin a awm zel dan tur a hriat tur thu a sawi.

MNF candidate RM Chakma
MNF party chuan Tuichawng biala an candidate atan Rasik Mohan Chakma an thlang. RM Chakma hnenah hian November 5, 2018 khan MNF president Zoramthanga'n Tuichawng biala MNF official candidate nihna certificate a hlan nia thu dawn a ni. Heti hian, Tuichawng bialah hian RM Chakma bakah Kali Kumar Tongchongya (INC) leh Dr Buddha Dhan Chakma (BJP)-te an ding dawn a ni.