Lungleiah Hnam Hnatlang neih chhunzawm

NGO Coordination Committee, Lunglei huaihawtin nimin khan Lunglei DC Complex-ah Mizoram chief electoral officer SB Shashank sawn chhuah phût nan Hnam Chhan hnatlang neih leh niin, mipui ṭhahnem tak an pungkhawm leh a; Shashank-a'n Mizoram a chhuahsan rih avangin lungawi lohna an lantir chu nimin tlai dar 3 khan tiam chin awm loin an titawp.

Nimin tlai khan lungawi loh lantirna khârna inkhawm tawi neih niin, Lunglei NGO Coordination Committee chairman Lalrotluanga'n a kaihruai a; Lunglei khawpui chhunga YMA branch pariat zaipawl infinte'n ‘Ro min relsak ang che’ tih hla an sa. Pathian hnena lawmthu sawina leh ram leh hnam tan ṭawngṭai rualna hun an hman hnuah Hnam Chhan hnatlang chu an khâr ta a ni.

Lunglei Joint NGO chuan, Hnam Hnatlang neih chhunga mipui inpe tak takte leh mamawhna zâwna thilpek, sum leh pai petute chungah lawmthu an sawi a, "Rálmuang taka kan lungawi lohna kan lantir theihna tura Lunglei DC leh a thawhpui te, SP leh a thawhpui te, min buaipuina zawng zawngah lawmthu kan sawi. Lunglei district hi district rálmuang a nih zel theihna atan theihtawp chhuah chhunzawm zel turin NGO Coordination Committee chuan kan ngen a ni," an ti.

Mahni duh thu ngeia Mizoram chhuahsan Bru-te'n Tripura state chhung­a vote an thlak chu rem an ti ngai dawn lo tih sawiin NGO Coordination Committee chuan, "An awmna constituency chhung ngeiah vote an thlak theih nana hma la turin sorkar thuneitute kan ngen nawn leh a ni," an ti a; Lunglei district mi leh sa, Mizoram páwna awm Bru-te chu electoral roll-a thun lo turin sorkar thuneitute an ngen bawk.