Kuhva lak luh qtl. 2,72,923 aṭangin Chhiah (revenue) Rs 27,29,230 hmu

Kum 2014 aṭanga kum 2021 chhung khan Mizoramah state dang aṭangin kuhva rah qtl. 2,72,923 lak luh a ni a, Commerce & Industries department chuan heng aṭang hian chhiah (revenue) Rs 27,27,230 a hmu.

Commerce & Industries (Commerce Wing)-in RTI Act hmanga zawhna an chhan danin; Vairengte, Kânhmun leh Bairabi-ah checkgate an nei a, state dang aṭanga lirtheiin a phurhte an challan nen a inmil nge mil lo tih an endik ṭhin.

Kum 2014 aṭanga kum 2021 chhung khan Commerce & Industries hnena kuhva rah phurh dil mi 45 an awm a, kuhva rah quintal 8,145 phurh an dil a ni.

Commerce & Industries SPIO chuan, "Kuhva rah phurh dilna la kher lo pawhin check gate-ahte sorkar rate bithliahte chawiin kuhva phurh luh theih tho a ni," a ti a; kum 2014-2021 chhungin Mizoramah Commerce & Industries check gate paltlangin kuhva rah qtl. 2,72,923 lak luh a nih thu a tarlang.

Kuhva rah lak luh tam ber kum, 2016 khan qtl. 1,12,520 lak luh a ni a, lak luh tlem ber kum kum 2020 khan qtl. 1,230 lak luh a ni. Kuhva rahah hian Commerce & Industries chuan chhiah, quintal khatah Rs 10 zel an la a, kum 2014-21 inkara kuhva rah lak luh qtl. 2,72,923 aṭangin Rs 27,29,230 an hmu a ni.

Mizorama kuhva rah lak luhte chu a tlangpuiin Assam leh Tripura aṭanga lak luh a nih thu Commerce & Industries SPIO chuan a tarlang a; kum 2022 kum kal mekah February 24, 2022 thlengin qtl. 375 lak luh a ni tawh tih a tarlang bawk.