MZP-in Zoram Ni an hmang

March 5, Inrinni kha India-in jet fighter leh bomb hmanga Mizoram a beih ní a ni a, Mizo Zirlai Pawl (MZP) chuan Zoram Ni vuahin an hmang ṭhin. Kuminah pawh Aizawlah an hmang leh a, minister of state Lalruatkima'n a hmanpui. Minister chuan, "Kan ramin zalenna a sualnaa harsatna hrang hrang tâwkte kan tawrhpui tak zet," a ti.

Lalruatkima chuan, Zoram Ní hman chhan sawiin, "Zoram mipuite'n zalenna kan duh a, chumi avanga hmalak duhna thinlung aṭanga irh chhuak a ni. India sorkarin a ram chhung ngeiah jet fighter hmanga a beih awm chhun kan ni hi a lungchhiatthlak. Jet fighter hmanga Aizawl leh hmun ṭhenkhat beih a nih avanga harsatna tâwkte kan hre reng," a ti a; zalenna sualnaa harsatna hrang hrang tâwkte an tawrhpui tak zet thu a sawi.

Mizote chu hnam huai­sen, tlawmngai, rinawm leh taima tia mite'n an hriat reng a pawimawh tih sawiin Lalruatkima chuan, "Hnam dangte hi kan zah tur a ni a, hlauh erawh kan hlau tur a ni lo. Zoram Ní hi Mizote harh tharna ní leh Mizote thinlungah Mizona (nationalism) tuh thar lehna ni nise ka duh," a ti a; state dangte tluk loh leh entawn nih theihna atana ngaihtuahna thar séng turin Mizo mipui a sáwm.

Zoram Ní hmannaah hian MZP president Lalnun­mawia Pautu leh F Vanlal­rochana te pawhin thu an sawi a ni.