Sorkar ṭha nei tura dodalna awmte kan su tlang ang - MPCC President

Mizoram Pradesh Congress Committee (MPCC) president Lalsawta chuan, Congress party-in sorkarna an chang leh a nih chuan sorkar ṭha nei tura dodalna awmte an sut tlang tur thu a sawi a; sorkarna siamtir ngei turin Mizo mipui a sáwm.

MPCC hruaitute chuan Inrin­ni khan Aizawl Press Club-ah thuthar thehdarhtute an kâwm a; an president Lalsawta chuan, "Kum 2023-ah kan sorkàr a, chief minister ka nih hlauh chuan, minister emaw, MLA emaw, nihna pawimawh nei, sorkara zahawm dinhmuna dingte'n chhan mumal taka hmingchhiatna an neih chuan ka bàn ang. Tu mitmei mah vên a hun tawh lo," a ti.

Lalsawta chuan, sorkarna an chang a nih chuan mipui tana ṭha ber tura an tihah chhungte, laina te, party mi emaw, tute intêl khawm emaw pawh ni se, politics aṭanga tumna tak tak (political will) hmanga an sut tlang tur thu sawiin, "Kan tum ram kan hre chiang a, kan sual ngar ngar dawn," a ti a; eirukna, duhàmna, induhsakna dik lo leh dan pêla restricted tender-a hna inpekte tihbo an tum thu a sawi.

Ṭhat loh theih lohna báwm an siam dawn tih sawiin Lalsawta chuan, "Kan hun laiin tlìn lohna kan nei ang, mahse, kan tlìn lohnate min hriatsak reng lo ula, kan sim tawh ang. Ram tana ṭha tur zawk kan ngai pawimawh tawh zawk ang. Kan danglam tawh dawn," a ti a; 'chance' pe turin mipui a ngen.

MPCC President chuan, sum hmanga mipui vote leia ram rorelna luah chu ram leh mipui tan ram tlukchhiat hlen theihna a nih thu sawiin, "Inthlana sum chakna hi kan party chuan tihhlum kan tum. Kan candidate-te sum hmanga inleì tlìn tum lo turin kan thunun ang. Mipuiin kan duh hi an duh a ni," a ti a, inthlan laia sum ûm ṭhin chu tlemtê chauh an nih thu a sawi.

Lalsawta chuan, dan loa thil tawlh rûk (smuggling) chu ram tlukchhiatna bul, mafia leh cartel-te'n ram rorelna an luhna bul a nih avangin an do thu a sawi a, "A huaisen lo zawk tur hi an huaisen ta lutukin ka hria. Inkiltawih zawk turte hi an huaisar ta lutuk. Dan kenkawhna hian awmzia a nei ta lo ni hialin kan hria a ni. A sual lama ṭang tlat sorkar hi awm rei tlak an ni lo, inthlanah an tla ngei ngei tur a ni," a ti.

Kut hnathawk leh kawng hrang hranga hna thawkte tan 'ṭang puihna' leh rahbi tleu tawhte puihna an siam dawn tih sawiin Sawta chuan, "In leh lo, chenna an neihna turin an pual tur remruatna kan siam ang. An mamawhna zâwn takah puihna buatsaih a ni ang. Sum sem ang chi kha chu kan ti lo ang," a ti a; NLUP an kalpui dawn tawh lo a, mirethei leh puih ngaite chan pual tur erawh an siam dawn thu a sawi.

Zawhna chhangin MPCC President chuan, an MLA neih mek pangate bak chu bial vil neih an remtih rih loh thu a sawi a, "Bial dang 35 chu Congress party-in kan vil rawn ang a, a hun takah a vil zui tur ruat a ni ang. Mi dang tam tak ram siamṭhat duhte sàwm kan la duh a, chu'ng mite tan chuan hmun ruakte kan dah rih a la ngai," a ti.

Press conference-ah hian MPCC vice president Lal Thanzara'n Lalsawta lehkhabu ziah 'Ṭhat loh theih lohna bâwm' tih a tlangzarh. Lal Thanzara chuan, Congress party-in sorkarna chang ta se, Zodintluanga leh Lal Thanzara'n chief minister nihna Lalsawta an pe phal tak tak lo ang tih sawi thâwm a awm thu sawiin, sorkarna an chan chuan Lalsawta a CM ngei tur thu a sawi a ni.

MPCC President thusawi dangte
1) Hlemhlêtna leh duhamna avanga ram rorelna a chhiat loh nan, MLA leh minister hmingchhiate chuan sorkarah dinhmun an nei lo ang; ka sawi huai chhan chu a ṭul vang a ni.
2) Restricted tender hi kan sorkar lai pawhin kan ti, mahse, thlan tur hriat lâwk saa tender chhuah hi kan ti lo ang.
3) Hnahlan leh Champhaiah sorkar remruatnain grape an chíng a, sorkar mek hian tihngaihna an hre dêr lo. Kan sorkar chuan kohhran kan kâwm ang. Inkawmhoa sawifel theih loh hi a awm kan ring lo.
4) Kan tling lo, kan fel lo, kan ṭha tâwk lo tih kan hria. Ṭhat tum na nâ nâ chu mipuiin min ṭawiawm ve theih kan beisei.
5) Mi duhâm lo kan nih a ngai, mi rinawm kan nih a ngai. Dâwt sawi ngai lo, taimak a ngai. Nuam chen tur emaw, ropui tur emawa rawngbawl turin kan inpe lo, hah tur leh a ṭul chuan retheihpui turin kan inpe.
6) Mipui hi an ṭha, kan ram pawh a ṭha, sorkar hi a ṭhat phawt chuan kan ram hian hma a sawn ngei ngei dawn.
7) Rorelna enin, mangang an tam tawh. Minister leh MLA niha neih belh tùm hauh loh hi a awl lutuk, hlawh ṭha tak an nei. Kan mipui retheihzia ngaihtuah hian duhâm a hun tawh lo.