Dan kalh leh thil ṭha lo tia sumdawng Mizote Guwahati-ah kal lo turin hriattir

Guwahati Mizo Welfare Association (GMWA) chuan thuchhuah siamin, Mizote buma India danpui kalha ei zawng ṭhin Mizote chu thil ṭha lo leh dik lo ti tura Guwahati leh a chhehvela kal lo turin an hriattir.

GMWA chuan, hun rei tak kal ta aṭangin Guwahati leh a chhehvelah sumdawnna thianghlim lo - pawisa tak leh a lem inthleng tawn, ailáidum man to taka hralh, rangkachak lei leh hralh, damdawi supply leh thil dang tam tak a awm ṭhin tih an tarlang.

Kuttling loa sum lak luh tumna avangin Guwahati, Mangoldai, Nagaon, adt.-ahte Mizoram aṭangin Mizote an kal nasa tih sawiin GMWA chuan, "Hei hian helaia Mizo awmte min tibuai thei hle a, ṭanpui ngai mi dangte buaipui hman loa min siam cháng a awm fo. Heng thil hi ram danpui kalh sumdawnna a ni a, thawk hah loa hausak tumna a nih bakah, rilru piangsual zia dik tak a ni," an ti.

GMWA tarlan danin, dan loa sum­dawnna chu social media aṭanga inṭanin, vai hoin tawktarh îtawm tak siamin Mizo tam tak an bum thla ṭhin a, an bum theih tam zawk chu thingtlang mi an nih rualin, Aizawl mi, lehkha thiam sang tak takte pawh an tel. A ṭhen chu cheng nuai tam tak keng thla a, kut béng ṭhaka bum tâwkte an ni a; mihring inrûkbote pawh a thleng ṭhin.

Guwahati leh a chhehvela thil dik lo buaipuitu tam ber chuan an thil tih tur chu thil dik lo leh dan phal loh a ni tih an hre sa vek tih sawiin GMWA chuan, “An rawn kal chhanah chhuanlam dawráwm tak tak - motor secondhand lei, motor part lei, company-a thawk tur, adt. an rawn siam ṭhin. Mizote bumtu zingah vai thurualpuitu Mizo an tel ngei bawk a, an thil chìn ṭhan titawp nghal turin kan ngen a, chhui zui mek an ni,” an ti.

GMWA chuan, “Mahni Mizopuite bum chíng, ram danpui kalha eizawng ṭhinte hi kan man chhuak a nih chuan an chungthu a rip hle dawn a, hnam dang laka Mizo hnam mualphona nasa tak a ni a, rang taka tihtawp vat ngaiin kan hria a ni,” an ti a; titawp tura hma an laknaa thawhpuiah Mizo mipui an sáwm.

Thil dik lo ti ṭhin leh tih tum Mizo tu mah Guwahati-ah kal tawh lo tura chahin GMWA chuan, “Rawn kal lui an awm a, harsatna engpawh an tâwk a nih chuan anmahni mawh liau liauah ngaiin, GMWA puihna dil tawh lo turin kan hriattir a, an lakah mawh kan phur lo ang a, police kutah hlan zel an ni zawk ang,” an ti.

Hetih lai hian GMWA chuan, thianghlim taka khualzin te, damlo mangang harsatna tâwkte tan an inhawng reng a, ṭanpui an ngaihnaa pui turin an inpeih reng tih sawiin, harsatna neite chu GMWA hruaitute leh Mizoram House deputy resident commissioner pan inthlahrung lo tur leh phone hmang pawha be mai turin Mizo mipui an chah bawk.