Aizawl DC pisa kan chhan ber Electric kal sual nia hriat a ni

Assembly session neih mekah Home minister Lalchamliana chuan ZPM member VL Zaithanzama zawhna ziaka chhángin, Directorate of Forensic Science Laboratory-in December 20, 2021-a Fire Scene Report a pek aṭanga hmuh danin, Aizawl Bawrhsap Pisapui kan chhan ber chu electric kal sual vang nia hriat a nih thu a tarlang.

Lalchamliana chuan, Aizawl DC pisa kânga thil chhia hlut zawng chhût nan preliminary assessment tih nual tawh a nih thu tarlangin, "Sorkarin a hlut zawng dik tak chhût felna a la siam rih lo. Aizawl DC pisapui hi Mizorama office hlun ber heritage building a ni a, heritage thil tam tak a awm. Tin, record hlui leh hlu vawn ṭhatna hmun a ni," a ti a; thil hlu tak tak kâng ral tate chu a hlut zawng chhût chhuah theih rual loh khawpa hlute an nih thu a sawi.

Home Minister chuan, Aizawl Bawrhsap Pisapui sa ṭha leh turin hmalak mek a nih thu a tarlang bawk.