Rawmi leh Brandisii chìnna hmun tlawh

Commerce & Industries minister Dr R Lalthangliana chuan March 5, Inrinni khan Saiphal zau Bamboo Plantation-a Ex-MNA Multipurpose Cooperative Society Limited-in SEDP hnuaia mau - rawmi leh brandisii an chìnna hmun a tlawh. Minister chuan, hmasawnna lang sar turin kum nga vel a ngaih dawn thu a sawi.

Dr R Lalthangliana chuan, mau chungchanga chief minister Zoramthanga hmathlir chu ram hmasawnna atan a pawimawh nia sawiin, a hlawhtlin ngei nan theihtawp chhuaha ṭan la turin a chah.

Mau chìn bul ṭanna an buaipui mek chu a hlawhtlin nan kum nga vel tal a ngaih a rin thu sawiin R Lalthangliana chuan, "Hmasawnna langsar turin kum nga vel a ngai dawn a, in tàwpsan mai ang tih ka hlau," a ti a, a hlawhtlin theih nan ngaihtuahna zawng zawng séng turin a chah.

Ex-MNA chuan mau an thàr dan azirin mau sawngbâwlna, semi processed anga buaipui theihna tur hmarua leh khawl bun a ṭul thu an sawi a; Minister chuan ṭha a tih thu te, changél aṭanga la zái siam theih dan kawng dap chu ṭha a tih thu leh Bamboo Development Agency-(BDA) in lo zir chhin se a duh thute a sawi.

Ex-MNA Bamboo Plantation hi SEDP hnuaia mau chungchanga hmalakna pilot project a ni a; an Society-ah hian member 115 awmin, ram hectare 180-a zauah rawmi leh brandisii ṭiak 66,500 an phun.

Dr R Lalthangliana hian hna thawkte hnenah kut tihfaina, thosi hlo leh thosi lên a pe a; Bamboo Development Board vice chairman Dr K Pachhunga, Horticulture leh Commerce & Industries department bakah BDA hotute'n an ṭawiawm a ni.