Pawngsualtu na taka hrem phût

Mizoram Gorkha Youth Association leh Mizoram Gorkha Women Association chuan, Gorkha hmeichhia pawngsualtua puh Suresh Chandra Meena, Dausa district, Rajasthan, tuna Kendriya Vidyalaya, Tanhrila zirtirtu ni mek chu a na thei ang bera hrem leh a hna aṭanga bàn an phût thu an tarlang.

MGYA leh MGWA chuan thuchhuah inṭâwm siamin, February 28, 2022 zan khan Gorkha hmeichhia chu Suresh Chandra Meena-a’n pawngsualin, thahah a vau zui tih an tarlang a, “Sawisain, he thil thleng hi mi dang bula a sawi chhuah chuan thah hialah a vau a. He thil thleng avang hian kan unaunu chu damdawi-inah enkawl mek a ni a, a rilru leh taksa nasa takin a hliam a, depression nasa takin a nei mek a ni,” an ti.

Suresh Chandra Meena chu man niin, jail-ah a awm mek a, bail a dil mek nia an hriat thu sawiin MGYA leh MGWA chuan, “Mizorama Judiciary-a thuneitute chu a bail dilna hnâwl a, bail phalsak lo turin kan ngen tlat a ni,” an ti a; a hna aṭangin chawlh lailâwktir ni tawh mah se, a hna aṭanga bàn nghal turin Kendriya Vidyalaya Sangathan hotute an phût tih an sawi bawk.