KHAWTHLIR

Thisen pe
Tuipuiral Zirlai Pawl (TZP) chuan March 5, Inrinni khan an din champha vawi 36-na pualin Hrangbana College-ah thisen pek an huaihawt a, mipa 47 leh hmeichhia 13-te'n Civil Hospital Aizawl tan thisen unit 60 an pe. KṬP, Melthum Branch pawhin Inrinni khan Synod Hospital blood bank-ah thisen unit 23 an pe a, petute mipa 16 leh hmeichhia pasarih an ni a; mimala pe (individual voluntary donor) mi pali an awm bawk.

Ṭanpuina pe
ZPM Ṭhalai president, Malsawmzuala Ralte, AMC councillor ni bawk chuan March 5, Inrinni khan Dampa AC biala Bawngthah leh Darlung khuaa village task force-te hnenah ṭanpuina pawisa bakah, kut tihfaina, hmai tuamna leh dis-infectant cleaner eng emaw zat a pe.

Mi 8,08,539 hnenah vaccine pe tawh
March 5, Inrinni thleng khan Mizoramah mi 8,08,539 hnenah Covid-19 vaccine dose 14,86,293 pek a ni tawh. Vaccine dose khatna dawng tawh mi 8,08,539 zinga mi 6,53,259-in dose hnihna an la tawh a, mi 24,495-in precautionary dose an la tawh bawk. March 5 bikah dose 300 pek a ni a, dose khatna 24, dose hnihna 261 leh precautionary dose 15 a ni.

Sahuan khâr zel
Aizawl Zoological Park (Sahuan) chu EFCC department hotute aṭangin hawng tura tih a la nih loh avangin khâr chhunzawm a ni a; mipui tlawh theih tura hawn theih hun tur hriat a la ni lo.

Lirthei tlân dan tur
Dapchhuah leh West Phaileng inkar kawng siam mekah chak zawka hna thawh a nih theih nan Mamit SP Vineet Kumar-a'n lirthei tlan dan tur a ruahman a, vawiin aṭanga April 7, 2022 thleng hman tur a ni. Zing dar 8 leh chhun dar 1 inkar, chawhnu dar 2 leh tlai dar 6 inkar leh, zan dar 8 leh zanlai dar 12 inkarahte lirthei tlân phal a ni lo.

Assembly session chhunzawm dawn
Mizoram State Legislative Budget Session chu March 4-6, 2022 chhung chawlh a nih hnuah vawiinah chhunzawm a ni dawn. Zawhna leh chhanna hun hman a nih dawn bakah, minister-te demand sawihoa pass tum a ni ang.