COVID-19 MIZORAM DINHMUN : Covid-19 vei enkawl lai 1.98% chiah an awm

Mizoramah Covid-19 vei March 4, Zirtawpniah mi 433 leh March 5, Inrinniah mi 568 hmuh chhuah a ni a, enkawl lai mi 4,296 niin, hmuh tawh zat aṭangin 1.98% chiah a ni tawh. Inrinni leh nimin khan hripui vei dam tawh mi 1,380 chhuahtir an ni a, hripui vangin mi pahnih an thi.

March 4-a Covid-19 vei hmuh chhuahte chu mipa 197 leh hmeichhia 236 an ni a; RT-PCR hmanga hmuh 17, TrueNAT hmanga hmuh 50, RAT hmanga hmuh 364 leh FIA hmanga hmuh pahnih niin, positivity rate 22.19% a ni.

Covid-19 positive March 5-a hmuh tharte chu mipa 247 leh hmeichhia 321 an ni a; RT-PCR hmanga hmuh 20, TrueNAT hmanga hmuh 48, RAT hmanga hmuh 497 leh FIA hmanga hmuh pathum niin, positivity rate 24.84% a tling.

March 5-a hmuh chhuahah hian Aizawl district aia hmuh tamna district pali - Serchhip, Mamit, Khawzawl leh Lunglei district-te a awm a; Mizoram chu India ram state leh union territory 36 zingah Kerala (1,836) dawta hmuh tamna ber a ni.

Inrinni khan hripui vei dam tawh mi 1,062 chhuahtir an ni a, nimin khan mi 318 chhuahtir an ni leh bawk.

IDSP record angin, Mizoramah Covid-19 vei 2,17,606 hmuh chhuah a ni tawh a, mipa 1,01,668 leh hmeichhia 1,15,938 an ni a, mipa aiin hmeichhia 14,270-in an tam zawk. Nimin tlai dar 5 thleng khan mi 2,12,647 (97.72%) chhuahtir an ni tawh a, mi 663 (0.30%) thi tawhin, enkawl mek mi 4,296 (1.98%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,17,606 chu mi 1,000 zelah hripui vei mi 198 an awm ang a ni a; mi 1,00,000 zela Covid-19 vangin mi 60 an thi tawh ang a ni tih sorkar thuchhuakin a tarlang.

Mizoramah March 5, 2022 thlenga swab sample endik tawh 18,48,367 aṭanga positivity rate chu 11.77% a ni a; RT-PCR hmanga endik zat percentage chu 20.10 a ni a, RAT hmanga endik zat chu 74.23% a tling.