Electoral roll thawn let tura ngenna Kolasib DEO-in ECI-ah a thlen dawn

Kolasib NGO Coordination Committee phût angin Kolasib district election officer (DEO) Dr Arun T, district bawrhsap chuan Tripura relief camp-a Bru-te electoral roll thun tharte paih an nih theihna atan electoral roll chu Mizorama rawn thawn let leh turin Election Commission of India (ECI)-ah a thlen dawn.

Nimin khan Kolasib Joint NGO hruaitute chuan DEO Dr Arun T chu DC conference hall-ah an kâwm a, additional DC H Lalṭanpuia'n thu a sawi. Joint NGO-te nen an inkawm hmain thurawn a hmuh angin Dr Arun T chuan DC pisaa officer-te ko khawmin thil awm dan a sawipui a, officer-te chuan thu dik tak sawi tawh turin DC hi an hrilh.

H Lalṭanpuia sawi danin, Tripura relief camp aṭangin Bru mi 471-in electoral roll-a thun an dil a, chu'ng zinga 468 chu Kolasib district-a mi niin, mi pathum chu Mamit district-a mi an ni. Dilna lut 471 aṭangin mi 218 chu Kolasib DC chuan October 27, 2018 khan electoral roll-ah a thun.

Electoral roll-a thun tawhte chu DEO-in ama thuin a paih thei tawh lo a, roll-a thun tawhte chu paih an nih dawn chuan ECI-in Mizoramah electoral roll an rawn thawn let (roll back) a ngai a ni. Joint NGO hruaitute chuan, Kolasib DEO chuan mipui a zah lo hlea an hriat thu an sawi.

Thu dawn danin, Tripura relief camp-a Bru-te electoral roll-a thun thar an nih lohna atan YMA sub-headquarters, Kolasib hruaitute chuan DC Dr Arun T chu an lo kâwm tawh ṭhin a, Kolasib MZP pawhin sit-in demonstration an lo huaihawt phah tawh Kolasib DEO chuan, Tripura camp-a Bru-te electoral roll-a a thun loh tur thu hi sawi mah se, a rûkin a thun ta tho a ni.

Joint NGO hruaitute leh Kolasib DC an inkawm zawhah Joint NGO-te chuan electoral roll thawn let leh tur ngenna ECI-a thawn tur an siam a, Dr Arun T chu hming ziak a, Election Commission-a thawn turin an ti. Lehkha hi nimin tlai khan Aizawl aṭanga kal NGO Coordination Committee hruaitute'n Dr Arun T bulah an luhpui a, hun eng emaw chen an sawiho hnuah Dr Arun T chuan lehkhaah a hming ziak a, ECI hnenah a thawn ang.

ECI hnena electoral roll thawn let tura ngenna an ziahah hian Tripura camp-a Bru-te chu hearing pawh nei loa thun an nih vang leh Jt. Chief Electoral Officer-in ennawn leh tura a hriattir vang a nih thu tarlan a ni.

Tarlan tawh angin, Kolasib Joint NGO leh mipuiin na taka an nawr hnuah Kolasib DEO hian electoral roll-a Bru voter thun tharte paih turin a intiam a; November 6, Thawhlehni zana DEO pisa kawta mipui pungkhawmte pawh zan dar 12 pelhah an ṭîn darh.