ZPM-in Brig. T Sailo thlânah pangpar an dah ; Six Basic Needs kan tihlawhtling ang - Duhoma

Zoram Peoples' Movement (ZPM) hruaitute chuan nimin khan Mizoram Peoples' Conference (MPC) president hlui leh chief minister hlui Brig. Ṭhenphunga Sailo thlân, Kanan Venga an in kawtah zahna pangpar an dah. ZPM chief ministerial candidate Lalduhoma chuan, ZPM an sorkar chuan Brig. T Sailo policy, Six Basic Needs an tihhlawhtlin tur thu a sawi.

Zahna pangpar dah puala inkhawm buatsaih hi ZPM PAC member B Lalchhanzova'n a kaihruai a; Lalduhoma chuan, Brig. T Sailo chu sipai a ṭan laia a huaisen avangin British sorkarin bravery award an pek thu sawiin, "India sorkar pawhin AVSM an hlan. Kum 1974 khan Mizo mipuite chhan chhuak turin Human Rights Committee a din. Khatih lai khan rambuai vangin sipaiin kan dikna chanvo min chhuhsak nasa a, Brig. T Sailo hi mipuite'n an thlamuanpui a, mipui tawrhna pawh a ziaawm phah a ni," a ti.

Lalduhoma chuan, sipaiin khua an sâwi khâwm ṭhin pawh Brig. T Sailo chuan ṭha a tih loh thu sawiin, "Khaw sâwi khâwm hi Gauhati High Court-ah a khing a, tihtawp a nih phah. Zo fate ṭhen hran kan ni pawh a vei hle a, ZORO a din. Inchîmralna lak ata kan him theihna atan hma a la a, Chief Minister a nih laiin Chakma foreigner 5,000 dawn lai a hnawt chhuak a ni," a ti a; Chakma foreigner hnawhchhuah chu chawlhsan turin ramhnuaia MNF sorkar leh Congress party-in Brig. T Sailo an vau tih sawi.

Chakma chungchanga Brig. T Sailo hmalakna chu chhunzawm zel ni se chuan tuna Chakma vanga Mizote buaina chu a reh tur thu sawiin Duhoma chuan, "Sorkarin hmalakna an nei lo a, zirlaite'n hma an lak pawhin Mizoram Police an tàwn tlang a ngai a, hliamte an tawrh phah ṭhin. Vote an hmuh dawn chu Congress leh MNF hian pawisak an nei lo a, harsatna a zual tual tual a ni. ZPM kan sorkar chuan Chakma foreigner hnawh chhuah hi kan chhunzawm ang," a ti.

ZPM CM Candidate chuan, Brig. T Sailo chu rambuai lai loah CM ni se chuan Mizoramin nasa taka hma a sawn tur thu sawiin, "Rambuai lai khan hmasawnna a tih hleih theih loh. Chuti chungin Zoram a fang chhuak a, ei leh bara intodelhna tur a ngaituah a, theihtawp a chhuah. Six Basic Needs-te kha sorkarin ngai pawimawh chhunzawm se chuan kan ram hian hma a sawn tawh ngawt ang," a ti a; ZPM chuan Six Basic Needs an tihhlawhtlin tur thu an tlangaupui zel tur thu a sawi bawk.

ZPM leader K Sapdanga pawhin thu sawiin, Brig. T Sailo chuan kum 1973-ah high school an kal laiin an sikul a tlawh tih a sawi a, "A thu min chah ka la hre reng, 'Nangmahah khan sual leh ṭha a awm a, ṭha lamah ṭang la, chaktîr rawh' tih a ni. A CM lai khan kan inzui fo a, a thil vei em em pakhat chu, power-a intodelh a ni. Serlui-A Mini Hydel Project an siam lai khan hnathawhna hmunah puan-in kaihin side office a nei a, hna thawh ṭhat loh theih a ni lo. Tun hnua mini hydel project hi chu anticipatory bail nen a inzawm deuh zel tawh," a ti.

Brig. T Sailo hi January 1, 1922 -ah a piang a, sipaiah brigadier niin, a chawlh hnuah kum 1974-ah Human Rights Committee a din a, Mizo mipuite sipaiin an tihduhdahna lak ata theihtawpin a chhan. Kum 1975-ah political party Peoples' Conference a din a, kum 1978-ah an party chuan sorkarna changin chief minister a ni.

PC party sorkarna chu thla ruk hnuah a tla a, kum 1979 inthlanah sorkarna chang lehin, Brig. T Sailo chu chief minister a ni leh a, a term tawp 1984 thleng CM a ni. Brig. T Sailo hian padma shree bakah Mizo Award hmasa ber leh chawimawina hrang hrang a dawng a, March 27, 2015 zing khan a thâwk ṭhat theih loh avangin damdawi-inah hruai a ni a, chawhma dar 11:50-ah a thih thu puan a ni.