Common candidate tur J Lalsailova'n Hachhek atan vawiinah nomination a file dawn
Hachhek constituency-a Bru candidate dah tumna a awma an hriat avangin Hachhek All NGO Coordination Committee (HACNCC) chuan Central YMA ráwn chungin candidate inṭâwm (common candidate) atan J Lalsailova, Mission Veng an thlang. Central YMA treasurer hlui J Lalsailova hian vawiin hian Mamitah nomination paper a thehlut dawn nia thu dawn a ni.
Vanglaini palai zawhna chhangin J Lalsailova chuan, nimin tlai khan nomination file-na hmun tur Mamit a pan dawn thu sawiin, "Naktuk hian nomination ka file hrim hrim ang. Bru candidate an awm loh chuan ka inhnûkdâwk leh ang a, an awm chuan ka ding tlang dawn a ni," a ti.
HACNCC pawhin Bru candidate an awm loh chuan common candidate neih kher ngai an ti lo.
J Lalsailova hi Central YMA treasurer hlui a ni a, tunah hian central executive committee member ni lai a ni. HACNCC chuan thuchhuah siamin, common candidate tura an sàwmna J Lalsailova'n a pawm avangin an lawm thu an tarlang.
Vanglaini palai zawhna chhangin HACNCC hruaitute chuan, political party candidate-te pawh common candidate chungchangah hian an biak thu sawiin, "Kan thu min zawmsak thei dawn niin a lang. Hotute nei an nih angin, hotute ráwn turin min ti a ni," an ti.
HACNCC hruaitute chuan, political party-te office-ah an lên vek tawh thu sawiin, "Ṭhenkhatin hnam thil a nih avanga an inhnuhdawh theih thu an sawi a, ṭhenkhat chuan an lo inràwn khawm tur thuin min chhang," an ti a; Bru candidate an awm loh chuan common candidate chu a inhnuhdawh leh mai tur thu an sawi.
Candidate hrang hrangte pawh ngawrh taka campaign chhunzawm zel tho turin an hrilh tih sawiin HACNCC hruaitute chuan, "Bru candidate an awm lo a nih chuan common candidate neih kher ṭul kan tih loh avangin ngawrh taka an campaign a ngai. Keini chuan Bru candidate an awm hi kan duh loh ber chu a ni," an ti.
Hetih lai hian, BJP-in Hachhek biala candidate atana an sàwm (Bru)chuan tun ang boruakah chuan candidate nih a tum loh thu Vanglaini palai zawhna chhangin a sawi thung.