KHAWTHLIR

Nunmawia post tur la siam lo
Mizoram chief electoral officer (CEO) SB Shashank-a'n Election Commission of India (ECI)-a a hêk vanga Ministry of Home Affairs (MHA)-in Mizoram aṭanga a sawn chhuah tak Lalnunmawia Chuaungo, IAS chu MHA-in a awmna tur leh a hna tur a la tifel lo. Vanglaini palai zawhna chhangin Lalnunmawia Chuaungo chuan, a awmna tur tihchian a la nih loh thu hi a sawi a, "Delhi-ah ka awm tawp rih," a ti. Tarlan tawh angin, Lalnunmawia Chuango hi Mizoram CEO-in a hêk avangin ECI thu angin MHA-in New Delhi-ah chhuk a, MHA-a in report turin a ti a; November 5, 2018 khan New Delhi a thleng a ni.

Tripura-a vote Thlaktir duh lo
Mamit District Ṭhalai Pawl chuan thuchhuah siamin, Election Commission of India (ECI)-in Tripura transit camp-a Bru, Mizorama vote neite an awmna Tripura state chhunga vote thlaktir a tum chu an duh loh thu an tarlang a, "India khua leh tui vote thlak theih chin tu pawhin vote thlak hi kan dikna chanvo a ni a, mi tu pawhin vote a thlak dawn a nih chuan an awmna polling station panin an haw mai tur a ni tih kan ngaihdan a ni," an ti.

Thawhho an rêl
Central YMA, Aizawl City Area Local Council Association leh Mizoram Merchants Association hruaitute nimina Central YMA Office-a inhmukhawm chuan, hâlpuah, hâlmawi leh silai lem, a mu kâp chhuak thei (a kâp na chi) khap chungchangah hmalakho a, theihtawp chhuaha thawhho an rêl. Central YMA chuan, MIMA hruaitute chu an member-te hnenah sorkar khap thilte Mizoram páwn aṭanga la lut lo tura hrilh turin a ngen a; Aizawl City Local Council Association hruaitute pawh anmahni area ṭheuh vila YMA-te thawhpui turin a ngen bawk. Hâlpuah, hâlmawi leh silai lem a mu nei chi khapna thupek hi Mizorama DC tinte'n an lo chhuah tawh a ni.

Bial 8 chuh dawn
National Peoples' Party (NPP) chuan kumin Mizoram MLA inthlanah bial pariatah candidate nei turin thutlukna an siam. NPP hian Dampa, Tuirial, Serlui, Champhai North, Serchhip, Kolasib, Thorang leh Tuichawngah candidate an nei ang.