Online hmangin in sak phal dilna AMC-ah 884 lut tawh, 580 pawm

Ministry of Housing and Urban Affairs-in Aizawl Municipal Corporation (AMC) chu online-a building permission dilna kalpui tura a tih angin June 1, 2018 aṭangin an kalpui ṭan a; online hmang hian November 2, 2018 thleng khan in sak dilna 884 a lut tawh a, 580 pawm a ni.

AMC hotute chuan, online hmanga in sak phalna dilna an kalpui chu India hmarchhak state zingah a hmasa ber an nih thu an sawi a, August 10, 2018 aṭangin paper hmanga hna thawh ṭhin chu an tihtawp nghal thu an sawi. AMC-ah hian engineer leh architech inziak lut mi 224 an awm a, an zinga tam zawk chuan sorkar hna an thawk.

AMC-in online building permission a kalpuiah hian 'Online Building Plan Approval System' (AOBPAS) hmanga hna thawh a ni a, an website chu OBPAS.amcmizoram.com a ni. Thla nga chhunga dilna lut zawng zawng 884 aṭangin AMC-in an enfiah hnuah 580 chu phalna an pe tawh a, dilna dang 304 chu enfiah mek a ni.

Thla nga chhung hian AMC huam chin veng hrang hrang aṭangin in sak phal dilna a lut a, Govt. Complex veng aṭangin dilna lut a awm lo. AMC chuan in sak dan turah chi thum - ordinary building, semi permanent building leh permanent building-ah a ṭhen a ni. Ordinary building sa turin AMC hnuaia engineer leh architech-te rawih a ngai lo a, AMC-a engineer-te'n drawing siamsakin, online-in an upload sak ṭhin. Semi permanent building leh permanent building atan erawh chuan AMC hnuaia inziak lut engineer leh architech-te chhawr a ngai.

In sak dawnah AMC-a inziak lut architech leh engineer-te chauh chhawr phal a ni a; tunah hian AMC-ah architech 60 leh engineer 164 an inziak lut mek. Inziak lut zingah sorkar hna thawk lai tam tak an awm a, PWD, PHE, Mizoram University leh MAMCO-a thawkte an ni hlawm.

Online hmanga dilna lut tamna veng

# Veng Dilna

1. Zemabawk 32

2. Bawngkawn 31

3. Durtlang Leitan 30

3. Bethlehem Vengthlang 30

5. Edenthar Veng 29

6. Luangmual 28

7. Ramhlun South 25

8. Durtlang 24

9. Chawlhhmun 21

9. ITI Veng 21

9. Salem Veng 21