Kohhran golden jubilee lawm mek

Mission Vengthlang Presbyterian Kohhran chuan an kum 50 tlin, golden jubilee an lawm mek a, November ni 7-11 chhung lawm tur niin, jubilee lawmna ruai November 10, Inrinniah an ṭheh dawn a, an kohhrana láwi tawhte tel turin an sáwm. Jubilee thupui chu 'Kristian nun puitling' tih a ni.

Mission Vengthlang Kohhran hi Mission Veng Kohhran aṭangin kum 1968-ah an indang a; golden jubilee hi November 7, Nilaini zan khan hmang ṭanin, vantlang inkhawmah upa dam lai zinga senior ber Upa C Hmingthanga'n thupui a sawi. Nimin khan Jubilee Exhibition an ṭan a, an kohhran bungraw hlui leh tunhma lama thlalakte an târ bakah, an kohhran hruaitu lo ni tawh, chatuan ram pan tate thlalak, milim ang deuha siam chu an pho chhuak bawk.