MZP-in PRISM hruaitute kâwm

MZP hruaitute nimin chawhnu khan PRISM pisaah PRISM party hruaitute an kâwm a; Mizoram-Assam ramri, ramri hrûlah sipai dah, Bairabi-a Zofate Chawlhbuk sak, zirna leh Lok Ayukta chungchanga an hmalak tum dante an zawt..

PRISM president Vanlalruata chuan, PRISM-in ramri an ngaih pawimawh thu sawiin, "Development nasa taka kalpui kan tum. International boundary kan neihte kan veng uluk hle dawn a, police pawh ṭha­hnem tak dah kan tum. BSF hian hmun ṭhenkhatah Chakma (foreigner)-te an hum ṭhin avangin BSP outpost awmnaah pawh police outpost dah thuah kan tum," a ti.

Armed police theihtawpa tihchak an tum thu sawiin Vanlalruata chuan, "Indo thei turin training pek kan tum bawk," a ti a; MZP-in Bairabi Zophaia Zofate Chawlhbuk sak an tumna hmun chu Mizoram chhung ngei a nih avangin, Inner Line Forest Reserved area sq.m. 509 chu an sorkar chuan an la let dawn tih a sawi.

PRISM President chuan, Mizoram zirna che mek leh quality tlahniam mek siamṭhat an tum a, zirtirtu directorate-a dah (attached) tihbo an tum thu leh zirtirtute chu an post-ah ṭheuh awmtir an tum thu te, all India civil service leh central service-ah Mizo tam zawk an luh theih nan hmalak an tum thu te, Chakma tamna bialah Mizo tam zawk an chen ve theih nan hmalak an tum thu te, Chakma foreigner hnawh chhuah an tum thute a sawi.

MZP hruaitute hi PRISM pisaah hian an president L Ramdinliana Renthlei hoin an kal a; PRISM aṭangin an President leh hruaitu dangte'n an lo dawngsawng a ni.