Lal Thanhawla'n lawmthu a sawi

Chief minister Lal Thanhawla chuan thuchhuah siamin, NGO Coordination Committee-in November 6-7, 2018 chhunga Aizawl leh Mizoram hmun hrang hranga Hnam Hnatlang an koha thawk chhuak Mizo mipui chungah lawmthu a sawi bakah, Mizo mipui inlungrualzia a lang chu lawmawm a tih thu a tarlang.

Lal Thanhawla chuan, "Mizo zawng zawng inlung­rual a, pawl hrang hrangte chungah lawmthu ka sawi a; Mizo te, hnam thilah kan ṭanrualzia nimin thil thleng khan a lantir chiang hlein ka hria," a ti.

Mizoram principal secretary (Home) transfer a nih dan­ah thu dik tawk loa inhêkna a awm tih sawiin Hawla chuan, "Principal Secretary hian Mizo leh kan sorkar duhthu tihhlawhtlin ngei duhin, Mizoram ṭhatna tur atan leh ECI-in kum 2014-a order a siam tawh Tuikuk raltlan Tripura mite'n vote an neihna Mizoram chhung ngeiah vote thlak ve tur a lo tih tawh chu kal tlangpui ni se, tih hi ka ngaihdan a ni," a ti a; a kaihhruai sorkar leh a thawhpuite duh dan pawh a nih thu a sawi.

Lal Thanhawla chuan, India rama state rálmuang ber Mizoram a ni chu a chhuan thu leh Mizorama inthlanna felfai leh ṭha tak a awm ṭhin chu khawvelin a hriatpui tih sawiin, "Mizo mipuite hi remna leh muanna hlutzia hretu kan ni," a ti. NGO Coordination hmalakna chu a thlàwp zel dawn thu sawiin, "Hetianga buaina lo chhuah chhan hi Mizoram hmangaih lotute thil tih a ni tih hriain, huaisen tak, muanawm tak siin Mizo mipuite pheikhai rual takin, party politics dahṭhain i kal zel ang u," a ti bawk.