Assam-in kan ram an luahte lâk lêt tuma hmalak mek a ni - Home Minister

Nimin Assembly session-ah Home minister Lalchamliana chuan, ramri chungchangah Assam sorkar nena inbiak a nih hunah Bengal Eastern Frontier Regulation 1875-ah din phawt a nih tur thu a sawi a, "Assam-in kan ram an luahte lâk lêt tuma hmalak mek a ni," a ti.

Opposition Group leader Lalduhoma'n ramrî-ah thil thleng eng emaw a awm loh lai chuan ramrî-ah buaina a awm lo emaw tih mai ṭhin a nih thu sawiin, "Thil thleng a awm loh avangin ramri a buai lo tihna a ni lo a, a buai reng. Boruak awm loh lai hian ramri chingfel turin sorkarin engtinnge hma a lak," tiin a zawt a ni.

Home Minister chuan, Mizoram sorkar chu BEFR 1875 ramriah a din tlat thu sawiin, "1875 hi sorkar chauh ni lo, Mizo mipui, tlawmngai pawl leh party hrang hrangte dinna a ni. A hlawhtlin dawn leh dawn loh tu mahin an sawi thei lo ang," a ti.

Kum 2020-a Assam nena buai aṭangin DC level leh chief secretary level-ah inbiakna a awm fo tih sawiin Lalchamliana chuan, "Tun hnaiah chief minister ve vete pawh an inhmu," a ti a; ramria harsatna chinfelna turin a rah hmuh tur a la awm loh thu a sawi.

Home Minister chuan, ramri chu Mizoram sorkarin a duh dan ngawta chinfel theih a nih loh thu sawiin, "State pahnih remtihnaa chinfel a ngai. Hmaichhanah sawiho a ni ang a, 1875-ah kan ding phawt dawn. A boruak azirin hmalak chhunzawm zel a ni ang," a ti.

Ramri chinfel dan tur ngaihtuahin political party leh NGO-te nen an ṭhutkhawm tawh thu sawiin Home Minister chuan, "Meeting chuan Boundary Committee din a rawt angin political party leh NGO-te telna, Deputy Chief Minister kaihhruai Boundary Committee a din a ni," a ti a, Committee chuan Assam sorkar nena inbiak hun a mi tur paper-te a buatsaih thu a sawi.

INC member Lalrindika Ralte-in Aitlang, Buarchep leh Saihapui-V aṭanga Assam police-te hnawhchhuah tumna a awm leh awm loh a zawhna chu Home Minister chuan, "Aw, awm e," tiin a chháng.

Mizoram chin nia ngaih Assam police-te'n an luah chin zawhna chhangin Lalchamliana chuan, "State pahnihte'n ramri kan pawm dan a inang lo. Mizoram sorkarin Mizoram - Assam ramria a pawm notification no. 22991 dated August 20, 1875 Inner Line on the Southern Frontier of the District of Cachar-in ramria a tarlan chin hi hmun tam tak Assam awpna hnuaiah a awm. Ram chán kan la ni chiah lo a, lâk lêt tuma hmalak mek a ni," a ti a, Assam awp chin zau zawng sawi mai theih a nih loh thu a sawi bawk.