Lirthei chesualah mi pathum thi

March 6, Pathianni tlai khan Mizoram chhung hmun pahniha lirtheia chetsualna thlengah mi pathum an thi a, mi dang pahnih an hliam.

Pathianni tlai dar 3 vel khan Sairang thlanga Buichali leì bulah bike a chesual a, bike khalhtu PB Lalnunmawia (27) Zuangtui, Aizawl chu Sairang damdawi-in thlenpui a nih hnuah a hliam tuar loin a thi. Thu dawn danin, PB Lalnunmawia te hian an ṭhianpa bike chhia an siam a, an siamṭha zo, a tlân chhin chu kawng thlangah a tlan liam a ni.

Pathianni vêk tlai dar 4 vel khan Lawngtlai dái, Siaha panna kawngah Maruti Zen car chu kawng thlangah tlain, metre 100 chuang a lum a, mi pahnih thiin, mi dang pahnih an hliam.

Thu dawn danin, car-ah hian mi pali an chuang a, chetsualna hmunah car neitu leh khalhtu B Roluahpuia (37) leh a nau Hnehtuliana Bawitlung (34), Lawngtlai College Venga B Zahmingthanga fate chu an thi a; mi dang pahnih, College Veng mi ve ve thote an hliam a, ngaih­tuahawm an ni lo. B Roluahpuia hi MPSC Combined Competitive prelims-ah a inziak tling a, main exam hmachhawn tum lai a ni.