Ram chhunga thawk chhuak tam thiam nih kan tum dawn - Sapdanga

ZPM working president K Sapdanga chuan, sorkar laipuia sum dil chhuak tam thiam an ngaisang lo a, ram chhunga thawk chhuak tam thiam nih an tum dawn tih a sawi.

Nimina ZPM pisaa an party zawm tharte lawm luhna inkhawmah thu sawiin K Sapdanga chuan, "Central-a sum dil chhuak tam thiam kan ngaisang lo a, ram chhung aṭanga thawk chhuak tam thiam nih kan tum dawn. Kan sorkar huna kan flagship tur chu mipui an ni dawn a, kum 35 zet ram mipuiin tui nú kan lo tlàn tawh a, kum 2023 aṭang chuan tui, a hnár fím ngei mipui kan tlantir tawh ang. SEDP paih a ni ang a, GSDP erawh tihpun a ni ang," a ti.

K Sapdanga chuan, rorel lai party thupui ber chu ZPM leader tihbuai leh a laka harsatna siam a nih thu sawiin, "Dan phuahchawp hmangin an paih a, dan dik taka lak luh leh a ni," a ti a; tihngaihna dang an hriat loh avangin a thusawi laiin a microphone an off tir ta mai mai niin a sawi.

Assembly Speaker chu thamna cheng nuai 100 laa puh a nih thu sawiin Sapdanga chuan, "Chhuah lama in lian ber leh tlak lama in lian ber neih tuma puh a ni hi a zahthlak hle. MNF sorkar kan hrawn meka sap ṭawng lâr ber pakhat chu restricted tender a ni a, Congress sorkar laia sap ṭawng lâr ber chu anticipatory bail a ni ve thung," a ti.

ZPM Working President chuan, kuhva tawlh boruakin Mizoram a chaih thu te, chiahpuam leh khehpuam hriat a nih tawh thute sawiin, "Phurh-puam pawh kan hria a. Tunah hian Vairengte leh Sairang inkarah teh-puam kan buaipui leh mek. Teh-puam thiam lo officer leh officer lo ṭhenkhat chu hlate khuaah sawn an ni," a ti a; chu'ngte chu mipuiin an hre reng dawn tih a sawi.

ZPM thuchhuah chuan, nimina an party-a an lawm luh zingah Kawlhnuna, IFS (Rtd), R Rohnuna, MCS (Rtd.), Lalchungnunga, MCS (Rtd.)-te an tel tih a tarlang.