Bank ṭangkaina uar zawka mipui zirtir a ṭul - Governor

Governor Dr Hari Babu Kambhampati chuan nimin khan State Bank of India (SBI), Mizoram hotute Raj Bhavan-ah a kâwm a; bank ṭangkaina leh mawhphurhnate uar zawka mipui zirtir a ṭul thu a sawi.

Larsap chuan, SBI-in Mizoram hmun hrang hranga mipui rawngbawlna huang an zauh mek chu lawmawm a tih thu a sawi a, "Mizoram mipui tam zawkin bank hnathawh leh bank ṭangkaina kan la hre chiang tâwk lo a, SBI hi lead bank a nih angin mipui zirtir kawngah hma hruaitu ni ang che u," tiin a chah.

Mizoram hmun hrang hrang a tlawhnaah sorkar hotu te, kohhran leh tlawmngai páwl hruaitute a kawm ṭhin thu sawiin Governor chuan, "Central social security scheme leh insurance scheme ṭha tak takte Mizoram mipuiin an dawng em tih chungchangte ka chîk ṭhin a, páwl hruaitute leh mi vengva zawka ngaihte pawhin heng scheme hi an la hmelhriat chiang lo tih ka hmu," a ti a; bank tam zawk chuan an customer-te hnenah hamṭhatna awm theite an sawifiah tâwk lo ṭhin tih a chian thu a sawi.

Dr Hari Babu Kambhampati chuan, mipui zirtir kawngah SBI chu ṭan la turin a chah a; ATM mamawhna a sàn thu te, eng emaw cháng chuan bank dàwrin mi tam tak an tlaivar ṭhin thu te, Mizoram kilkhâwr berah pawh hmasawnna thlen tur leh mipui thawh chhuah a pun theih nan theihtawp chhuah a ṭul thute a sawi bawk.

SBI hotute sawi danin, Mizoramah SBI branch 46, CSP 27 leh ATM booth 106 a awm mek a ni.