Aizawlah thil fûn mawi zirho a ni

Nimin khan Aijal Club-ah thil siam chhuahte tuam mawi zirna, Packaging for Export of Agri Food, Handloom & Handicraft Products of Mizoram’ buatsaih a ni a, Commerce & Industries secretary Esther Lal Ruatkimi’n a hmanpui.

Zirhona hi sorkar laipuia Ministry of Commerce and Industry, Indian Institute of Packaging (IIP) Kolkata Centre leh Mizoram sorkara Commerce and Industries department-te buatsaih a ni.

Esther Lal Ruatkimi chuan, Mizorama thil siam leh thar chhuah hrang hrangte chu state páwna thawn chhuak turin ṭha leh mawi taka fûn a ngai tih sawiin, “Packaging industry hi Mizoramah kan la nei rih lo a, hemi kawngah hian ṭhalaite’n ngaihtuahna thar an sên a ngai,” a ti a; entreprenuer-te chu an thil siamte thawn chhuak tura hma la ngei tura chahin, sorkar pawhin puih a inhuam thu a sawi.

Training-ah hian IIP director Dr Tanweer Alam leh Mizoram Food Processing Agency general manager Zosangliana te pawhin thu an sawi a; IIP mithiamte’n kal khawmte chu thil pawimawhte an zirtir a ni.