Covid-19 vei hmuh zat a tlahniam

March 6, Pathianni khan Mizoramah Covid-19 vei mi 228 hmuh chhuah a ni a, hmuh zat a tlakhniam bakah, positivity a tlahniam hret. Nimin khan hripui vei dam tawh mi 1,153 chhuahtir an ni a, hripui vanga thi an awm lo.

Pathiannia Covid-19 vei hmuh chhuahte chu mipa 95 leh hmeichhia 133 an ni a; RAT hmanga hmuh 227 leh FIA hmanga hmuh pakhat niin, positivity rate 17.70% a ni. RT-PCR leh TrueNAT hmangin swab sample endik a ni lo.

Nimin khan hripui vei dam tawh mi 1,153 chhuahtir an ni a, district tina chhuak zat chu - Serchhipah mi 251, Aizawlah 237, Kolasib-ah 158, Lungleiah 115, Khawzawlah 103, Saitualah 98, Mamitah 73, Hnahthialah 50, Champhaiah 40 leh Lawngtlaiah 28 an ni.

IDSP record angin, Mizoramah Covid-19 vei 2,17,834 hmuh chhuah a ni tawh a, mipa 1,01,763 leh hmeichhia 1,16,071 an ni a, mipa aiin hmeichhia 14,308-in an tam zawk. Nimin tlai dar 5 thleng khan mi 2,13,800 (98.15%) chhuahtir an ni tawh a, mi 664 (0.30%) thi tawhin, enkawl mek mi 3,370 (1.55%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,17,834 chu mi 1,000 zelah hripui vei mi 198 an awm ang a ni a; mi 1,00,000 zela Covid-19 vangin mi 60 an thi tawh ang a ni tih sorkar thuchhuakin a tarlang.

Mizoramah March 6, 2022 thlenga swab sample endik tawh 18,49,655 aṭanga positivity rate chu 11.78% a ni a; RT-PCR hmanga endik zat percentage chu 20.09 a ni a, RAT hmanga endik zat chu 74.25% a tling.