CEO SB Shashank a chhuak dawn Bru-te'n Tripura-ah vote an thlâk dawn lo

Election Commission of India (ECI) palaite chu deputy election commissioner Sudeep Jain hoin nimin khan Aizawlah an lo kal leh a, tlaiah All NGO Coordination Committee hruaitute nen an inkâwm. ECI palaite chuan, Tripura relief camp-a Bru-te chu an awmna hmunah vote thlaktir an nih dawn loh thu leh, Mizoram chief election officcer (CEO) SB Shashank chu Mizoram aṭangin sawn chhuah a nih dawn thu an sawi.

Meeting zawha thuthar thedarhtute zawhna chhangin, NGO Coordination Committee chairman Vanlalruata, CYMA president chuan, hun eng emaw chen an ngen tawh angin, Tripura relief camp-a Bru-te chu an camp-a vote thlaktir tawh loh ECI-in an intiam tih a sawi a, "An camp-ah Bru-te vote thlakna atan EVM an dah tawh dawn lo a, Mizoram chhungah ngei thlaktir an tum," a ti.

Vanlalruata chuan, CEO SB Shashank sawn chhuah chungchang pawh an thlen nawn leh tih sawiin, "ECI lam chuan SB Shashank-a'n dan bawhchhiatna a nei loh tih an sawi nâin, Mizo mipuite hmakhua ngaiin, an rilrute an hriatthiam thu an sawi a, CEO thlak an intiam," a ti a; CEO chungchanga an hmalaknaah hlawhtlinga an inngaih thu a sawi.

CEO thlak hun tur ECI lamin an la sawi theih loh thu sawiin Vanlalruata chuan, "Sorkar kalphungah chuan thil tihfel ngaite a tam thu an sawi a, chuvangin, CEO thar ruat hun tur an la sawi thei lo. CEO hi rawn dah hrih lo mah se, kan inthlan turah harsatna a awm lo a, a pangngaiin a kal tho dawn a ni," a ti.

Joint NGO Chairman chuan, Home secretary sawn chhuah tak Lalnunmawia Chuaungo chungchangah ECI hotute chu Mizo mipui duh dan an hriat vek tawh thu an hrilh nawn tih sawiin, "A rang lama Mizorama sawn leh turin kan thlen. A thu hrimah, inthlan lai bak ECI-in thuneihna an nei lo a, an sawn hun chhung pawh inthlan buaipui chhung atan chauh a ni," a ti a, inthlan zawhah Lalnunmawia chu Mizoramah an kîrtir leh mai tura an ngaih thu a sawi.

NGO Coordination Committee hruaitute chuan Kolasib thil thleng chungchang pawh an thlen tih an sawi a, "Kolasib boruak a buaithlak a, Tripura camp-a Bru-te electoral roll-a thun an nih danah mipuite an lawm loh avangin a rang lama ngaihtuah turin kan thlen," an ti.

NGO hruaitute chuan ECI hotute hnenah hian Kolasib DEO Dr Arun T-a'n Tripura camp-a Bru-te electoral roll-a a thun delete leh an nih theihna atana roll thawn let leh tura a ngenna leh Kolasib DEO-in Dr Arun T an duh loh thu an ziahna an pe a ni.

ECI team Mizorama lo kalte hi Sudeep Jain bakah, ECI secretary SB Joshi leh Jharkhand CEO Lalbiaktluanga Khiangte te an ni a, vawiinah Champhai an tlawh ang a, chawhnu lamah Mizoram an chhuahsan leh ang.