MZU Convocation vawi 13-na neih a ni

Mizoram University (MZU) chuan nimin khan an campus-a Multipurpose Hall-ah Convocation vawi 13-na an hmang a, Governor Kummanam Rajasekharan, MZU rector ni bawkin a hmanpui. Mi 3,922 hnenah degree hlan a ni a, chu'ng zingah chuan doctor of philosophy (Ph.D) hmu thar mi 44 an tel.

Governor chuan, degree nei tharte chu beiseina sang tak nen khua leh tui ṭha leh ràwn tlak ni turin khawtlang rawngbawlnaah a lawm lut tih sawiin, "Degree ṭha tak neih hi thil lawmawm tak a ni a, mahse, mahse hlawhtlinna vàwrtàwp a ni lo a, a bul ṭanna chauh a ni," a ti.

Kummanam Rajasekha­ran chuan, "Mithiamte hlawh­tlinna leh hlawhchham dan hi khawtlang hma­sawnna atan a thawh hlâwk em tihte leh khawtlangin harsatna a tawh mekte sutkian dan kawng a hmuchhuak em tihte'n an hrilhfiah ṭhin," a ti a; university-in a pawmpui degree hlu tak takte chu thiamna hman ṭangkai kawngah a kawltute nawr kaltu ni se a duh thu a sawi.

Convocation-ah hian Ministry of Defence hnuaia Defence Research & Deve­lopment Organisation (DRDO) Research & Deve­lopment chair­man Dr G Satheesh Reddy chu khual­zahawm leh special speaker a ni.

Dr G Satheesh Reddy chuan, MZU-a zirtirtute inpekna leh taimakna avangin hun reilote chhungin MZU-in nasa takin hma a sawn tih sawiin, "MZU chhuak mithiamte hi a ber kai turin theihna an nei a ni," a ti a; India ramin science & technology-ah kawng tin­rengin hma a sawn tih a sawi.

Convocation-ah hian MZU vice chancellor Prof. KRS Sambasiva Rao chuan zirlai hlawtling mi 3,922 hnenah degree a pe a, chu'ng zinga mi 948 chu convocation-ah hian an tel. Convocation-a rawn tel degree dawng zinga 44 chu Ph.D. an ni a, master of philosophy (M.Phl.) dawng mi 48 an awm.

Master degree dawng mi 463, professional course (MBA, MJMC, MCA, MEd, M.Pharm)-a master degree dawng mi 53, bachelor degree dawng mi 214 leh professional course (B.Tech, BBA, B.Pharm, BSc Nursing, B.Sc(MLT), LLB, B.Ed, BCA, B.Optom, N.Sc. RIT) -a bachelor degree dawngtu mi 126 an awm. Gold medalist mi 49 hnenah hlan a ni a, subject hrang hranga ti ṭha zual mi 23 hnenah Book Prize hlan a ni bawk.

Mizoram University hi kum 2000-a din a ni a, National Assessment and Accreditation Council (NAAC) chuan 2014 leh 2019 inkar atan Grade 'A' a pe. National Institution Ranking Framework (NIRF) pawhin MZU chu kum 2018 chhunga university 700 zingah a ṭha 81-naah a dah mek a ni.