Mi 208-in MLA inthlan atan nomination an theh lut

November 28, 2018-a Mizoram Legislative Assembly inthlan neih tura candidate nih tumte tana nomination thehluh hun chu nimin tlai dar 3 khan a tàwp a, mi 208-in nomination an thehlut. Inhnûkdâwk duh tan November 14 thleng hun hawn a ni dawn.

Nomination paper thehluh aṭanga a lan danin, Mamit district-a Assembly consti­tuency pathum - Hachhek, Dampa leh Mamit bialte chu chuh tura hming pe lut tamna ber a ni a, chuh tuma hming pe lut mi pariat ṭheuh an awm a ni.

Nomination paper thehluh aṭanga a lan danin, Indian National Congress (INC) leh Mizo National Front (MNF) chuan Assemby constituency awm zawng zawng, bial 40-ah an chuh kim dawn.

Bharatiya Janata Party (BJP) chuan bial 38 atan nomination an thehlut a; Aizawl West-III bialah candidate an siam lo hrim hrim a, Aizawl South-II biala candidate atana an dah Lalniliana'n nomination a file lo.

Zoram Peoples' Movement (ZPM) chuan bial 35 atan nomination paper an thehlut a; Tuichawng, Lawngtlai East leh West, Saiha leh Palak bial tih loh bial dang zawngah an chuh dawn a ni.

Congress party president Lal Thanhawla chuan Serchhip leh Cham­phai South-a ding turin nomination a file a, MNF president Zoramthanga chuan Aizawl East-I atan nomination a thehlut. ZPM chief ministerial candidate Lalduhoma pawh bial pahnihah a ding dawn a, chu'ngte chu Aizawl West-I leh Serchhip a ni.

Zoram Thar pawl chuan Assembly constituency 22-a ding turin nomination an thehlut. An president Rev.Dr Zaichhawna chuan Serchhip leh Aizawl West-I atan nomination a file a; a fate pahnih - Lalhrizeli Hlawndo (Aizawl North-II leh Lengteng) leh Lalruatfeli Hlawndo (Aizawl North-I leh Tuikum)-te pawhin bial hniha ding turin nomination an thehlut. Anni hi chhungkaw pakhat (in khata cheng) aṭanga candidate awm tam ber (mi 3) leh dinna bial nei tam ber (bial 5) an nia hriat a ni.

PRISM chuan bial 15 a ding turin nomination an file a, an president Vanlalruata chuan Serchhip leh Aizawl North-I a ding turin nomination a file.

National Peoples Party (NPP), Mizo­ram chuan bial pariat-a ding turin nomi­na­tion an thehlut a, an convener Lianzuala chuan Dampa leh Mamit biala ding kawp turin nomination a file a ni.

National Congress Party (NCP) pawhin constituency pasarihah chuh an tum a, an president Lalawmpuia Chhangte chuan bial pahnih - Mamit leh Dampa-ah din a tum. NCP candidate zingah hian Congress minis­try-a MLA Hmingdailova Khiangte pawh a tel a, a bial ngai Tuirial-ah a ding ang.

Nomination file zinga hian party emaw, pawl dang emaw thlawptu nei loa nomination thehlut (independent liau liau) mi pathum - Lawngtlai East, Saiha leh Palak bialah mi pakhat ṭheuh an awm a ni.

Hetih lai hian, ZPM, Zoram Thar leh Na­­tional Congress Party (NCP) chu ECI recog­nised party an nih loh avangin an can­di­date-te chuan independent angin nomi­nation an thehlut a; ZPM candidate-te chuan chhinchhiahna (symbol) atan lukhum parh an hmang a, Zoram Thar pawlte chuan zungbun an hmang thung.

November 28-a MLA inthlan tur atana nomination lut zawng zawngte hi November 12-ah endik a ni dawn a, November 14 thleng inhnuhdawh theih hun hawn a ni ang.