MNF president Zoramthanga'n NEDA-a MNF tel dan a sawifiah
Mizo National Front (MNF) president Zoramthanga chuan nimin khan an party pisaa inkhawmah thu sawiin, North East Democratic Alliance (NEDA)-a an tel dan a sawifiah.
Zoramthanga chuan, NEDA chu India hmarchhak bika NDA péng pakhat, state tina party lian deuh awm khawmna a nih thu sawiin, "NDA nen sawi hran theih a ni lo... NEDA emaw NDA emaw hian Parliament-a thawhona a kâwk ber," a ti.
Zoramthanga chuan, kum 2014-a Lok Sabha inthlan zawhah Congress kaihruai UPA nena thawhho ai chuan tiin MNF, MPC leh ZNP-te nen BJP kaihhruai NDA an zawm nia sawiin, "Han inkâwk tur bik kan awm lo. 26.7.2014 khan PM hnenah Congress sorkarin NLUP a kalpui dan
ṭha kan tih loh thu lehkha kan thawn a, lehkhaah chuan ‘We, the branch of NDA...’ tiin kan ziak a, Pu Lalduhoma, Pu Lalhmangaiha leh kei pawhin hming kan sign hlawm a ni," a ti a; PM atana Narendra Modi lak luh lawmnaah pawh Lalhmangaiha leh Lalduhoma te nen Delhi-ah an kal ho niin a sawi.
National Democration Alliance (NDA) hi ram pum huapa BJP kaihhruaia party hrang hrang intel khawm an ni a; NEDA hi BJP-in kum 2016-a India hmarchhaka political party hrang hrangte intel khawmna a din a ni a, NEDA-ah hi chuan Mizoram aṭangin MNF chiah an tel a ni.
MNF President chuan, Tuichawng bialah BJP leh Congress-in candidate an dah a, hun eng emaw chen kan ngaihchân hnuah MNF-in candidate an dah ve ta tih sawiin, "Party dangin candidate an dah laia a dah lo bik nih kan duh lo. Vai party pahnih BJP leh Congress kuta kan rama bial pakhat Tuichawng dah ringawt mai chu kan remti lo. A ram neitu ngei MNF hian Tuichawng bialah candidate kan dah ve ta a ni," a ti a; MNF candidate chu a tlin ngei an beisei thu a sawi.
Zoramthanga chuan, "BJP nena kan thawhho lohzia hre reng chungin min puh lui tlat. Congress president Pu Lal Thanhawla’n ‘BJP nena kan thawhhona kan chhu chat’ tiin hmanni deuhah khan a puang a, mahse, tun thlengin Chakma Autonomous District Council-ah Congress leh BJP an la thawk dun reng a, sorkarna an la siam dûn reng a ni," a ti a; tuna BJP thawhpui mektu chu Congress party an nih thu a sawi.