ZPM-in tlin ngei kan inbeisei - ZPM Leader

Zoram Peoples' Movement (ZPM) chuan nimin chawhnu khan Thingsulthliah Diakkawnah Ṭawi Assembly constituency atan campaign kick-off hun an hmang a; thu sawitu K Sapdanga, ZPM leader chuan, Mizoram inthlanpuiah ZPM-in tling turin seat 25-30 an lak ngei an beisei thu leh, chu'ng zingah chuan Ṭawi bial pawh a tel thu a sawi.

Inkhawm hi MPF Thingsul­thliah Local Forum secretary C Laldawngliana'n a kaihruai a; K Sapdanga chuan, kumina Mizoram inthlan tur ang reng renga kohhran, tlawmngai pawl, ṭhalai leh hmeichhiate'n an buaipui a la awm ngai loh thu sawiin, "Hun dangah chuan inthlannaa vote thlak kan hreh ngawih ngawih ṭhin. Tun ṭumah chuan Mizo mipuite'n vote thlak kan nghakhlel tawh a, ZPM hian mipui, kohhran, retheite mang­anna mittui hru hul turin MLA 25-30 Pathianin min pek kan ring nghet tlat a ni," a ti.

K Sapdanga chuan, Mizoram kaihhruai danah felhlel a awm ṭhin avangin eirûkna a awm phah ṭhin tih sawiin, "ZPM sorkar chuan rua­hmanna felfai tak neiin, chief minister pawh bàn thei hial khawpa thuneihna sang nei Val Upa Council-in min uap dawn bakah, administration felfai tak nen sorkar an vil reng dawn a ni," a ti a; VUC-te chuan sorkar aṭangin hamṭhatna derê pawh an dawng dawn lo tih a sawi.

Ṭawi biala ZPM candidate R Lalṭhatluanga pawhin tyhu sawiin, "Kan rama party politics ruih chilhna hian sakhaw lungphûm a sâwi nghîng a, kan society-ah inrin tawnna a tichhia a, Pathian kan rinna a tidal a, chu chuan kan hriat lohin hremhmun kawngah min hruai mek. Party hotute tihsual hre thei lo leh hre phal lo ringtu intite hian kan nun kan bihchian a hun tak zet. ZPM hi Pathian leh mipuite'n sorkarna min pek chuan hei hi kan titawp ang a, mi tinin zalen taka politics an sawi theih nan mipui sorkar kan siam dawn a ni," a ti.