MZP hruaitute'n MNF hotute an kâwm

MZP hruaitute chuan political party hrang hrang hruaitute an kawmna kal zelah nimin khan Mizo Hnam Runah MNF party hotute an kâwm a; MNF vice president R Tlanghmingthanga leh hruaitu dangte'n an lo dawngsawng.

MZP president L Ramdinliana Renthlei chuan, ramri, zirna, Chakma foreigner leh Lok Ayukta chungchanga MNF hmalak tum dan leh hmachhawpte an zawt a; ramri chungchangah MNF hotute chuan, MNF-in sorkarna an siam chuan Mizoram leh Assam inrinaa reserved forest sq.miles. 509 chu nei let turin hma an lak dawn thu te, Mizoram border area changtlung zawk leh hmasawnna tura hmalak an tum thu te, Mizoram ramri zawng zawngah force pawh dah belh a nih tur thute an sawi.

MNF hruaitute chuan, School Education department budget-ah tun ai tam sum dah dah an tum thu an sawi a, "Sikul kai hun tihdanglam ngawt a tum lo," tiin, khawtlang leh mipui dinhmun azira ennawn an tum thu an sawi. Khawpui leh thingtlanga zirtirtu dinhmun inthlau lutuk chu an sorkar chuan Mizoram pumah rualkhai taka kalpui an tum thu an sawi a ni.

Chakma foreigner chungchangah MNF hotute chuan, MNF hun kal tawh leh hmasa lamah Chakma foreigner nasa takin an dodal ṭhin niin an sawi a, "Chutiang rilru chu tunah pawh kan la pu reng a, kan la dodal zel dawn. MNF-in sorkarna a chang a nih chuan a ṭul dan azirin Chakma foreigner endik hnatlang kan nei ang’," an ti.

MNF hruaitute chuan Lokayukta chungchang sawiin, Mizoram Assembly-a pass tawh leh hmang tura a lo rel vek tawh a nih thu an sawi a, "Hetianga eirukna leh hlemhletna chhuia hrem theitu tur dah hi thil ṭha tak a ni a, kan ram pawhin a mamawh tawh hle. MNF party chuan sorkarna a chang a nih chuan Lokayukta chu rang taka hman nghal tur a ni," tiin MZP hruaitute an hrilh.