NGO-te resolution a hlawhtlinna atan ECI-in hma a la mek - ECI Deputy EC

Election Commission of India (ECI)-a deputy election commissioner Sudeep Jain chuan, Mizorama NGO Coordination Committee-te resolution thehluh a hlawhtlin theihna atan hma an lak mek thu a sawi. Hetih lai hian, Mizoram chief electoral officer SB Shashank-a sawn chhuahna order a chhuah thu hriat a la ni lo.

November 9, 2018 zana Secretariat conference hall-a meeting an neih zawha Vanglaini palai zawhna chhangin Sudeep Jain chuan, Mizoram Joint NGO-te'n SB Shashank sawn chhuah an phût chungchang chu NGO hruaitute nen meeting-naah chip chiar taka an sawiho thu a sawi a, "Thil awm dan kan inhrilhhfiah. NGO-te duh dan hi kan zah a ni," a ti.

Sudeep Jain chuan, Mizo mipui ngaihdan chungchanga NGO Coorination Committee-te'n resolution thehluhah pawh ECI-in hma a la nia sawiin, "November 7 khan ECI chuan press release a chhuah tawh. Resolution an rawn thehluh hi kan zah a ni," a ti a; NGO-te resolution thehluh tihhlawhtlin a nih theih nan ECI-in hma a lak zel thu a sawi.

Sudeep Jain chuan, inthlanna kalpui tum a nih danah Mizoram NGO-te'n complaint an neia a hriat loh thu sawiin, "Hriat fiah tâwk loh thil a awmah ka ngai. Dan hriat chian tâwk loh deuhte a awm a, zanina NGO-te nen kan meeting-ah pawh kimchang takin kan inhrilhfiah leh a ni. An lungawi kan beisei. Dan awm sa anga thil tih tur leh zawm tur a awm a ni," a ti.

MLA inthlan lo awm tura inbuatsaihna chu a ṭha tâwka a hriat thu sawiin Sudeep Jain chuan, "Mi zawng zawng thlawpna kan hmu a, complaint ka dawng lo. Ṭum dang ang bawkin inthlanna thianghlim leh felfai a awm leh ngei ka ring tlat," a ti.

Sudeep Jain chuan, NGO leh kohhran hruaitute hmanga Model Code of Conduct tihhlawhtlin a nih dan chu state dang entawn tlakah ECI-in a ngai tih sawiin, "India ram pumah entawn atan ṭha kan ti," a ti a; inthlana Mizoram kalphung chu India ram tan model a nih thu a sawi.

Tarlan tawh angin, NGO Coordination Committee chuan November 7, 2018 khan ECI hnenah resolution thehlutin, ECI-in April 7, 2014-a ziaka thu a tiam tawh anga Tripura refugee camp-a Bru-te Mizoram chhung ngeia vote thlaktir leh CEO SB Shashank sawn chhuah an phût thu an tarlang.

Hetih lai hian, SB Shashank hi Mizoram CEO a nihna aṭanga sawn chhuahna order chhuah a nih thu hriat a la ni lo. SB Shashank hi November 9, 2018 ral hmaa sawn chhuah a nih loh chuan Mizoram sorkar hnathawkte'n an thawhpui tawh loh tur thu, Federation of Mizoram Government Employees and Workers chuan ziakin ECI-ah an lo thlen tawh a ni.

Mizoram dinhmun enfiahtu ECI team-ah hian Deputy Election Commissioner bakah, ECI secretary SB Joshi leh Jharkhand CEO Lalbiaktluanga Khiangte te an ni a; Aizawl an lo thlenin anmahni ṭawiawmtu atan Mizoram additional CEO Lalzarmawii ruat a ni bawk.

ECI palaite hi November 9 zan vek khan Mi­zoram Kohhran Hruaitute Committee hruai­tute'n pawhin an kâwm a; inthlanna dik leh felfai a taka a awm theihna turin thil engkim dik tak leh langtlanga tih an duh thu an hrilh.

ECI palaite hian November 10, Inrinni khan Champhai an tlawh a, an tih turte an tih hnuah helicopter-in Lengpui Airport an pan a, chawhnuah New Delhi-ah an haw a ni.