KHAWTHLIR

Thisen pe
Inrinni khan Chawlhhmun North Branch KṬP chuan an kohhran hall-ah blood donation camp an huaihawt a, an member mipa 28 leh hmeichhia pahnihte'n Synod Hospital tan thisen unit 30 an pe. TKP Lawngtlai Chandmary Unit pawhin lawngtlai District Hospital tan unit 29 an pe a, a petute mipa 16 leh hmeichhia 13 an ni.

Bo zawnna khâr
November 4, 2018 aṭanga chin hriat loha awm Lalramnghaka (28) s/o Biakpari, Thenzawl Field Veng fapa chu a bo
aṭanga ni sarih chhung Thenzawl khawtlangin an zawn tawh hnuah, hmuh a la ni lo a; khawtlang­in an zawn ni sarihna, nimin khan khawtlang huapa zawn hna tihtawp a ni. Lalramnghaka hi ft. 5'5" vela a sang a ni a, a bo laiin kawr dum leh kekawr dum (Turbo) a ha a, chapal pâwl a bun a ni.

Chin Relief Society
Mizoram Chin Relief Society general headquarters chuan November 10, Inrinni khan Aizawla Lai House-ah General Body Meeting an hmang a, an president K Thangkhuma'n a kaihruai. Mizoram Chin Relief Society hian Myanmar-a leimin vanga chhiatna tâwkte an lo ṭanpui tawh a, mi harsa damlo leh Aizawl leh Mizoram chhung hmundanga mitthi Myanmar-a lak tur chhungte an lo ṭanpui tawh ṭhin a ni.

Lehkhabu tlangzarh
F Lalsanglura'n a pa chanchin ziahna, 'F Lalngura chanchin leh a kutchhuak hlate' tih lehkhabu a siam chu November 9, 2018 tlai khan Chaltlang YMA Hall-ah Mission for Christ dintu Rev. Lalchungnunga'n a tlangzarh. F Lalngura hi Tarpho lal fapa niin kum 1920-ah a piang a, kum 1995-ah a thi. Hla a lehlin zingah 'Jerusalem ka hmun ropui' tih te, 'Isua Kraws mak tak chung­ah' tihte a tel a; hla eng emaw zat a phuah bawk.