MNF President-in an tlak chhan a sawi hian Insiamṭhat an tum lohzia a tilang - Congress party

Mizoram Pradesh Congress Committee (MPCC) Media department chuan Inrinni khan Aizawl Press Club-ah thuthar thehdarhtute an kâwm a; MNF President-in kum 2008 leh 2013 inthlana an tlak chhan thu belhchian dâwl lo hmanga mipuite hnena a sawi reng chuan insiamṭhat an tum lohzia a tilang niin an sawi.

MPCC Media department chairman Lallianchhunga chuan, kum 1998-2008 chhunga Mizorama sorkarna siamtu MNF party thil tih dan tam tak chu mipuiin an la hre reng nia sawiin, "Thu belhchian dâwl lo hmanga an tlak chhan mipuite hnena MNF President-in a la sawi chhuak fo hian insiamṭhat an tum lohzia a tilang. MNF party leh an hruaitute hi hmana mite tho kha an la ni," an ti.

Lallianchhunga sawi danin, kum 2008 inthlana MNF an tlakin MNF President-in EVM a mawhpuh a ni. MNF sorkar laia Aii Pûk, ram hmangaihtute thlám ropui tak tak te, police mawza manto leh Tuirial Hydel Project hlamzuih te, Referral Hospital hluihlâwnte vangin mipuiin an hnâwl niin a ngai thei lo.

Mizoramin inthlan a hma­chhawn tawh chinah tualṭo party tla tawh ding chhuak an la awm lo nia sawiin Lallianchhunga chuan, "Term li sorkarna chelh thei erawh an awm tih Mizo Union dinhmun (1948, 1952, 1957, 1962) aṭangin a lang. Term hnih bak political party-te'n sorkarna an chelh nawn ngai lo tih hi thu dik lo a nih avangin Congress party hian sorkarna kan siam leh dawn," a ti a, Congress paihthla tur khawpa political party rintlak an awm lo niin a sawi.

Lallianchhunga chuan, MNF-te chu president nei vanduaiah puhin, "Eptu party zinga lang lian deuh ber MNF-te vanduaina lian tak chu an President hian mipui rin a hlawh lo a, a hun kal tawh chu sawi ngai loah lo ngai ta pawh ni ila, tun hnai, campaign ngawrh laia Youtube leh social media-a a thusawite hi mipuite'n nuihzatah an la tlat zel mai. Mumang rama a chenna aṭang hian a la harh chhuak lo. MNF President hi mipuiin ram hruai turin an ring lo a ni," a ti.