PRISM-in counter affidavit 28 thehlut

PRISM party chuan thuchhuah siamin, Legislative Assembly inthlan turah an party aṭangin bial 15-ah nomination an theh­lut a, an candidate tura an tih zingah mi 10-in harsatna an neih avangin nomination an thehlut ta lo tih an tarlang. Hetih lai hian, MLA inthlana din tuma nomination file mi 28 lakah counter affidavit an thehlut tih an sawi.

PRISM chuan, an thil tum pathum zinga a pahnihna chu 'Electoral reform' a nih thu sawiin, chumi kawnga an pawl hmalak tawhna leh party hmalak tum dante vawi tam tak an puangzar tawh tih an sawi a, "PRISM party November 9, 2018 (Zirtawpni) khan India Danpui Article 191-na te, Representation of the People Act, 1951 Section 10 leh Section 9A te, Central Civil Services (Conduct) Rules, 1964 Section 5(1)-te bawhchhiaa nomination file leh affidavit-a ziah lan tur thup ṭhen mi hrang hrang mi 28 lakah counter affidavit file a ni," an ti.

Dan bawhchhiaa nomination file dangte pawh awm mah se, tuna an tih chin, counter affidavit file bak chu an ti thei rih lo a tih sawiin, PRISM chuan, "Hei ringawt pawh hian returning officer-te'n dik taka ro an rel chuan, kan ramah danglamna lian tak thlenin, kan ram politics a thian thianghlim nasa hle dawn a ni," an ti a; rorelna dik a awm loh chuan thuneitu sang zawk hnena thlen an tum thu an tarlang.