MZP-in BJP hmalak tum dan an zawt

MZP chuan November 10, Inrinni khan Bharatya Janata Party (BJP) Mizoram pisaah an lêng a, BJP general secretary H Ramthansanga leh hruaitu dangte nen an inkâwm. MZP president L Ramdinliana Ren­thlei chuan, ramri, zirna, Chakma foreigner leh Lokayukta chungchanga BJP party-in hmalak an tum dan leh an hma­chhawpte a zawt.

Mizoram leh state dang­te inrina chung­changah BJP hruaitute chuan, Mizoram state ramri bakah, ram dang nena inrina zawng zawng­ah sipai tam tak an dah an tum thu an sawi a, "Mizoram leh Assam ramri bik hi Mizoramah BJP-in sorkarna an siam chuan rang taka sawifel nghal theih a ni. Central leh Assam-ah BJP chuan sor­karna a neih tawh avang­in thil harsa a ni lo ang. Ṭawngkama sawi fel theih a nih loh pawhin Court-ah kal theih a ni," an ti.

Zirna chungchangah BJP hruaitute chuan, "School Education depart­ment nasa taka thuam ṭhat a ngai a, thiamna tak tak neih theihna turin a bul aṭanga ṭan ṭhat a ngai. BJP a sorkar chuan education system bakah education service siam a ni ang," an ti. Lokayukta chung­changah BJP an sorkar chuan Lokayukta an hman nghal tur thu an sawi.

BJP hruaitute chuan, Chakma foreigner chung­changah, sorkar laipuii India rama state tin hnenah foreigner dap chhuahna atana pawimawh Citizen Identification hmang tura a hriattir tawh ang­in, Mizo-rama Congress sorkarin hmang ngam lo mah se BJP chuan hman nghal tur thu an sawi a, "CADC area-a foreigner lo lut tur venga man chhuak turin BJP chuan India Reserve Police tam tak dah turin ruahmanna a siam vek tawh," an ti.