Mizo IAS officer-te'n ECI palai an hmu

Mizorama IAS Officer Retired Association-te chuan, Election Commission of India (ECI) Mizoram dinhmun enfiah tura a rawn tirh ECI team-te hnenah, Mizoram mipuiin chief electoral officer SB Shashank-a laka lungawi lohna an lantir chu lang loa thil tih a awm vang nia an ngaih thu an hrilh.

Mizo IAS pensioner-te hian November 9, Zirtawpni tlai khan ECI palaite an kâwm a; an president Lalmalsawma, Mizoram chief secretary hluiin hoin, mi dangte chu P Rohmingthanga, L Colney, PC Lawmkunga, Lalhmingthanga leh Vanengmawia te an ni.

IAS Officer Retired Association-te chuan, Mizoram inthlan neihna tura inbuatsaih laia tlawmngai pawl hrang hrangte'n lungawi lohna an lantir a, SB Shashank chhuak tura an nawr chhan leh hlauhthawn an neih chu lang loa thil tih awm nia an hriat vang a ni tih an sawi a; Tripura-a Bru relief camp-ah vote thlaktir tawh lo tura ECI-in April 7, 2014-a thu a lo tiam tawh chu kengkawh tur leh mipui hmaah chiang taka puang tura an duh thu te, Home secretary Lalnunmawia Chuaungo sawn chhuah a nih dawnah insawifiahna hun pek ni loa an hriat thute an sawi bawk.