Inthlan atana inbuatsaihna thlirho

Election Commission of India (ECI)-in Mizo-ram Assembly inthlan awm tura Lunglei district vil tura a ruat observer-te chuan nimin khan DC conference hall-ah Lunglei DC leh DEO Dr Ankita Chakravarty, SP C Lalthanmawia leh Assembly constituency-a RO leh ARO-te an kâwm a, inthlan atana inbuatsaihna an thlirho.

Dr Ankita Chakravarty chuan, election hmachhawn tura inpuahchahna chak taka kalpui mek zel a nih thu a sawi a, "Electric connection, inthiarna thianghlim, ramp, inbiakpawhna (mobile connectivity) leh kawng siamṭhat hnate polling station hrang hrangah kalpui a ni. Mobile network awm lohna hmunahte MPRO nen thawkhoin wireless set hman tum a ni," a ti.

Meeting-a tarlan danin, election duty tur official-te tan training thawh khatna zawh tawh niin, inthlanna hmanrua EVM leh VVPAT-te first level checking (FLC) neih a ni tawh a, November 18-ah ECI aṭangin engineer pathumin an endik leh ang.

ECI-in Lunglei district atan observer paruk a ruat a, nimin meeting-ah hian general observer pathum - MS Prasanna Kumar (IAS), Armstrong Pamei (IAS) leh Chakravarthi Mohan (IAS) leh police observer Sangakal Veeresh Prabhu-te an tel a ni.